بنگلوو،9/مئی (ایس او نیوز) نما میٹرو میں ایک مسافر کی مشتبہ حرکتوں کے پیش نظر چوکسی بڑھانے کے بعد اب بنگلور میٹرو پالیٹن ٹرانسپورٹ کارپوریشن (بی ایم ٹی سی) اور کرناٹک اسٹیٹ روڈ ٹرانسپورٹ کارپوریشن (کے ایس آر ٹی سی) نے بھی میجسٹک کے بس اسٹیشنز پر اچانک مسافروں کی تلاشی لینے کا کام شروع کردیا ہے- یاد رہے پیر کی شام میٹرو کے میجسٹک اسٹیشن پر میٹل ڈٹیکٹر پر ایک مسافر کے داخل ہونے پر الارم بجاتھا- شک کی بنیاد پر اس سے تھیلی کھول کر دکھانے کے لئے کہا گیا تو وہ بھاگ کھڑا ہوا تھا- اس کے بعد اس نے پھر ایک دیگر دروزاہ سے اندر داخل ہونے کی کوشش کی اور وہاں بھی ویسی ہی حرکت کی- میٹرو عملہ اور کچھ آٹو ڈرائیوروں نے اسے پکڑنے کی کوشش کی جو ناکام رہی- اس کے بعد تمام میٹرو اسٹیشنوں پر چوکسی بڑھادی گئی ہے- بنگلور میٹرو ریل کارپوریشن لمیٹڈ (بی ایم آر سی ایل) کے چیف پبلک ریلیشنز آفیسر بی ایل یشونت چوہان نے بتایا کہ احتیاطاً چوکسی برتی جارہی ہے- انہوں نے کہا ”ہمارا عملہ پہلے ہی چوکس ہے- ہم نے اب انتظامات کو مزید بہتر کردیا ہے تاکہ کوئی بھی ناخوشگوار واقعہ نہ ہونے کو یقینی بنایا جاسکے-“ یہاں سے قریب بی ایم ٹی سی اور کے ایس آر ٹی سی اسٹیشنوں پر بھی اچانک مسافروں کی تلاشی لینے کا کام شروع کردیا گیاہے- کے ایس آر ٹی سی کے ایک افسر نے بتایا کہ سری لنکا میں پیش آئے واقعہ کے بعد سے حفاظتی انتظامات سخت کردیئے گئے ہیں - انہوں نے کہا ”ہوم گارڈز کی تعداد بڑھا کر 28 کردی گئی ہے- چونکہ بس اسٹیشن کی کوئی کمپاؤنڈ دیوار نہیں ہے- داخلہ کے تمام مقامات کی کڑی نگرانی کی جارہی ہے- علاقہ میں لوگوں کی حرکات وسکنات پر نظر رکھنے کے لئے 32سی سی ٹی وی کیمرے مناظر ریکارڈ کررہے ہیں -“ بی ایم ٹی سی میں حفاظتی انتظامات و نگرانی کے انچارج انوپم اگروال نے بتایا کہ مشتبہ مسافروں کا خدشہ رہنے کی وجہ سے تلاشی کارروائی جاری ہے- خاص طورپر لوگوں کے ساتھ جو سامان ہے، اس کی تلاشی پر توجہ دی گئی ہے- یہ پوچھے جانے پر کہ سی سی ٹی وی کیمروں کے درمیان فاصلہ زیادہ ہے، انہوں نے کہا کہ حکومت سے درخواست کی گئی ہے کہ ایسے کیمروں کی تعداد بڑھائی جائے-