اُڈپی میں فرضی ڈاکٹروں کا وبال؛ محکمہ صحت کے اہلکاروں نے کی کاروائی؛ کئی کلینکس اورلیباریٹریس کے خلاف مقدمات درج
اُڈپی 17/ دسمبر (ایس او نیوز) ضلع میں فرضی ڈاکٹروں کی لعنت کو روکنے کے مقصد سے محکمہ صحت کے افسران اور عملہ نے مختلف مقامات پر چھاپے مارکاروائی کرتے ہوئے جانچ پڑتال کی ہے۔ پتہ چلا ہے کہ اس بار کئی کلینکس اور لیباریٹریس میں خامیاں پائی جانے کی بنیاد پرنقلی ڈاکٹروں کے خلاف پابندی عائد کرنے کے ساتھ ساتھ کئی ایک کے خلاف KPME ایکٹ کے تحت مقدمہ درج کیا گیا ہے اور لیباریٹریس اور کلینکس پر چھاپہ مارکر اُسے ضبط کیا گیا ہے۔
اسی طرح کی ایک کاروائی میں اُڈپی تعلقہ ہیلتھ ڈپارٹمنٹ کے افسران کی ایک ٹیم نے آدی اڈپی میں ڈاکٹر دھنونتری کلینک پر چھاپہ مارا اور آیورویدک ڈاکٹر کے طور پر رجسٹرڈ اے آر اچاریہ کو ایلوپیتھک دوائیں دیتے ہوئے پائے جانے پر ڈاکٹر کے خلاف معاملہ درج کیا گیا۔
کنداپور تعلقہ ہیلتھ ڈپارٹمنٹ کے افسران نے ناوندا میں واقع ڈاکٹر نمبیار کلینک پرچھاپہ مارا اور یہاں بھی آیورویدک ڈاکٹر پرجیت ایس نمبیارپرایلوپیتھک دوائیں دینے کا معاملہ درج کیا گیا۔
اُپوندا میں لتا سنیل نامی خاتون کو لائسنس کے بغیر سشما کلینکل لیباریٹری چلاتے ہوئے پایا گیا تو لیب کو سیل کرتے ہوئے معاملہ درج کیا گیا ۔ کنداپورمیں بغیر رجسٹریشن کے بایو لائن لیب نامی لیباریٹری چلانے پر ایف آئی آر درج کی گئی ۔ کنداپور کے آرور میں لائسنس کے بغیر کلینک چلانے کے الزام میں کے ایس راو نامی شخص کے خلاف معاملہ درج کرتے ہوئے کلینک کو سیل کیا گیا۔
محکمہ ہیلتھ کی جانب سے عوام کو جعلی ڈاکٹروں سے باخبر رہنے کی تاکید کی گئی ہے، اسی طرح عوام سے کہا گیا ہے کہ وہ KPME ایکٹ کے تحت بوگس یا غیر رجسٹرڈ ڈاکٹروں سے علاج کرنے سے گریز کریں۔
