ہبلی 6؍اگست (ایس او نیوز)شہر میں ڈینگو بخار کی وباء پھیلنے کی وجہ سے ایک چھ سالہ بچہ ہلاک ہونے کی خبر موصول ہوئی ہے۔ جس کے بعدعوام نے کارپوریٹر کی طرف سے وبا ء کی روک تھام اور صفائی ستھرائی کے مناسب اقدامات نہ کیے جانے پر احتجاجی مظاہرہ کیا ۔
بتایا جاتا ہے کہ دو دن پہلے سوہاب نداف(۶سال) نامی بچے کی موت ڈینگو بخار کی وجہ سے ہوئی تھی۔ہبلی دھارواڑ مہا نگر پالیکے کے 39وارڈ سے تعلق رکھنے والے کارپوریٹرستیش ہانگل کے خلاف احتجاج پر اترے عوام نے پرانی ہبلی میں تقریباً پانچ گھنٹے تک راستہ روکو احتجاج کیا۔آنند نگر کے عوام نے کارپوریٹر پر الزام لگایا کہ تقریباً ایک سال سے اس علاقے میں مناسب صفائی کا کوئی انتظام میونسپل کارپوریشن کی طرف سے نہیں کیا گیا ہے۔ جس کی وجہ سے اس علاقے میں وبائی امراض پھیل رہے ہیں، اور اب ڈینگو کے واقعات بڑھتے جارہے ہیں۔