یروشلم؍برلن،23؍جنوری (ایس او نیوز؍ایجنسی) اسرائیل میں ہلاکت خیز کورونا وائرس کے مزید 54135 نئے کیسز رپورٹ ہوئے ہیں، جس سے اس ملک میں متاثرین کی کل تعداد 22,12,596 ہوگئی ہے۔ ادھر جرمنی میں کورونا کے پیش نظر عائد کی گئیں پابندیوں کے خلاف مظاہرہ کیا جا رہا ہے۔

اسرائیل کی وزارت صحت نے ہفتے کے روز کہا کہ اس مہلک وائرس کی وجہ سے مزید 22 افراد ہلاک ہو گئے ہیں۔ جس کے بعد کورونا وائرس سے مرنے والوں کی تعداد 8 ہزار 393 ہوگئی جب کہ سنگین حالت میں مبتلا مریضوں کی تعداد 638 سے بڑھ کر 732 ہو چکی ہے۔

ملک میں کورونا ایکٹیو کیسز کی تعداد 4 لاکھ 42 ہزار 229 کے نئے ریکارڈ پر پہنچ گئی ہے جب کہ یومیہ وائرس کی شرح 20.61 فیصد تک پہنچ گئی ہے۔ جرمنی کے شہر ہیمبرگ میں ہزاروں افراد نے کورونا وائرس پر عائد پابندیوں کے خلاف مظاہرہ کیا۔

جرمن روزنامے ڈائی ویلٹ کی رپورٹ کے مطابق ہفتے کے روز ہیمبرگ میں ہونے والے اس مظاہرے میں تقریباً تین ہزار تین سو افراد نے حصہ لیا۔ اخبار کے مطابق اس دوران بہت سے مظاہرین چہرے پر ماسک نہیں پہنے ہوئے تھے اور سماجی فاصلے کے اصولوں کو نظر انداز کر رہے تھے۔ وہ ویکسینیشن اور قرنطینہ کے اقدامات کے خلاف نعرے لگا رہے تھے۔

قابل ذکر ہے کہ اس سے ایک ہفتہ قبل جرمنی بھر میں ہزاروں افراد نے احتجاج کیا تھا۔ اس کے بعد ہیمبرگ میں تقریباً 3000 افراد نے کورونا ویکسینیشن کے حق میں مظاہرہ کیا تاہم شمالی بندرگاہی شہر میں بھی غیر قانونی اینٹی ویکس اجتماع کا انعقاد کیا گیا۔