بینگلور30/اکتوبر (ایس او نیوز) ہفتے کے روز ہیگڈے نگر میں واقع حج ہاوس میں آگ لگنے کی واردات اور قریب 3.5 کروڑ روپیوں کے نقصان کے دو روز بعد پیر کو 21 بسوں کو آگ لگنے سے مزید کروڑوں مالیت کا نقصان ہونے کی خبر ملی ہے۔

ذرائع سے ملی اطلاع کے مطابق پیر کی صبح بسوں میں آگ لگنے کی واردات اس وقت پیش آئی، جب ایک گیریج میں لگی آگ نے پاس ہی کھڑی تقریباً 21 بسوں کو اپنی لپیٹ میں لے لیا ۔ اس حادثہ میں کوئی جانی نقصان نہیں ہوا لیکن بیشتر بسیں خاکستر ہوگئیں۔

گری نگر پولیس تھانے کی حدود میں آنے والے ہو سکیرے ہلی علاقے کے ویر بھدرپا نگر میں موجود پی ای ایس کالج کے عقب میں موجود ایک گیریج میں جہاں بسوں کی مرمت کی جاتی تھی آگ لگ گئی ۔ دیکھتے ہی دیکھتے گیریج کے پاس کھڑی ہوئی تقریبا 21 بسیں جل گئیں۔ بتایا جاتا ہے کہ اس گیریج کے پاس کھڑی کی گئی کمپنی کی بسوں کو بھی بھاری نقصان پہنچا ہے۔

ذرائع کے مطابق صبح 11 بجے کے آس پاس ایک بس میں آگ دیکھی گئی ۔ دیکھتے ہی دیکھتے آگ پھیل گئی اور 21 بسیں اس کی لپیٹ میں آگئیں۔ فائر فورس کی پندرہ گاڑیوں نے اس آگ کو قابو میں کیا۔ گیریج کے پاس ہی موجود بسوں کے شیڈ کے لوگوں نے فوری طور پر باہر نکل کر اپنی جانیں بچائیں۔ اس آگ کی وجہ سے آس پاس کی عمارتوں کو بھی نقصان پہنچا ہے۔

اس واقعہ کے بعد نائب وزیر اعلی ڈی کے شیو کمار ، وزیر ٹرانسپورٹ رام لنگاریڈی اور دیگر پولیس حکام نے جائے حادثہ کا دورہ کیا۔ ڈی کے شیو کمار نے کہا کہ یہ بات سامنے آئی ہے کہ ویلڈنگ کرتے وقت یہ آگ لگ گئی تھی۔ انہوں نے کہا کہ جس جگہ پر حادثہ ہوا یہ نجی املاک ہے۔ افسروں سے پوچھا گیا ہے کہ اس جگہ پر آگ سے بچنے کے لئے کوئی انتظام کیوں نہیں تھا، انہوں نےاس کی سختی سے جانچ کرنے کی ہدایت دی ہے۔ شیو کمار نے بتایا کہ گزشتہ ایک ہفتہ میں بنگلورو میں تین بڑے آگ حادثے ہو گئے ہیں ۔ اس لئے سخت احتیاط برتنے سے متعلق رہنما خطوط جاری کرنے کا فیصلہ جلد ہی لیا جائے گا۔ انہوں نے کہا کہ اس زمین کے مالک کے خلاف ایف آئی آر درج کرنے کی بھی ہدایت دی گئی ہے۔