کاروار ، 21 / اپریل (ایس او نیوز) اتر کنڑا لوک سبھا حلقے میں الیکشن کے لئے ابھی بس چند دن رہ گئے ہیں اور اس انتخاب میں حق رائے دہی استعمال کرنے والوں کی قطعی فہرست تیار کر لی گئی ہے ، جس کے مطابق اس وقت اس حلقے میں 16.41 لاکھ ووٹرس موجود ہیں ۔
    
اتر کنڑا میں 7 مئی  کو جو پولنگ ہونے والی ہے اس میں اتر کنڑا ضلع کے 12,21,413، بیلگاوی ضلع کے  خانہ پور علاقے کے 2,19,442، کتور علاقے سے 2,00,301 یعنی جملہ 16,41,156ووٹرس اپنا حق رائے دہی استعمال کریں گے ۔ 
    
خیال رہے کہ جنوری میں جب قطعی ووٹرلسٹ تیار کی گئی تھی تو اس وقت اتر کنڑا ضلع میں جملہ 12,07,433 ووٹرس فہرست میں تھے ۔ اس کے بعد نئے نام داخل کرنے یا اخراج و ترمیم وغیرہ کے لئے 9 اپریل تک  جو سہولت دی گئی تھی اس کا استعمال کرتے ہوئے گزشتہ تین مہینوں کے اندر اتر کنڑا میں 13,980 نئے نام ووٹر لسٹ میں داخل کیے گئے ۔ ان میں 6,006 نوجوان لڑکے اور 7,954 نوجوان لڑکیاں شامل ہیں ۔ خاص بات یہ نوٹ کی گئی ہے کہ اس مرتبہ ووٹر لسٹ میں اپنا داخل کرنے کے سلسلے میں 18 سال کے نوجوانوں نے زیادہ دلچسپی دکھائی ہے ، ورنہ اس سے پہلے عام طور پر 20 سال عمر ہونے پر بھی نوجوان اپنا نام ووٹر لسٹ میں داخل کرنے کی طرف توجہ نہیں دے رہے تھے ۔