بنگلورو ، 4/ مارچ (ایس او نیوز /ایجنسی) وزیراعلی سدارامیا نے کہا ہے کہ نائب وزیر اعلیٰ ڈی کے شیوکمار کی نگرانی کے لیے فون ٹیپنگ کیے جانے کے الزامات بے بنیاد اور سیاسی مایوسی کا مظہر ہیں۔ انہوں نے اپوزیشن لیڈر آر اشوک اور مرکزی وزیر ایچ ڈی کماراسوامی کے بیانات کو مسترد کرتے ہوئے کہا کہ اس نوعیت کے دعوے محض قیاس آرائیاں ہیں۔
وزیر اعلیٰ نے اپنے میڈیا بیان میں کہا کہ کانگریس حکومت کے اقتدار میں آنے کے بعد سے اپوزیشن قائدین ان کے اور ڈی کے شیوکمار کے تعلقات میں دراڑ ڈالنے کی کوشش کر رہے ہیں، تاہم دونوں کے درمیان باہمی اعتماد اور ہم آہنگی مضبوط ہے اور اس پر کسی بھی قسم کی افواہوں کا کوئی اثر نہیں پڑے گا۔
انہوں نے کہا کہ کانگریس ایک جمہوری جماعت ہے جہاں اراکین کو پارٹی نظم و ضبط کے دائرے میں رہتے ہوئے اظہارِ رائے کی آزادی حاصل ہے، تاہم تمام اہم فیصلے پارٹی ہائی کمان کی ہدایات کے مطابق کیے جاتے ہیں۔ ان کے بقول وہ اور ڈی کے شیوکمار اس مؤقف کو بارہا واضح کر چکے ہیں۔
سدارامیا نے دعویٰ کیا کہ ماضی میں ریاست کی سیاست میں فون ٹیپنگ اور خفیہ نگرانی جیسے معاملات سامنے آتے رہے ہیں، جن سے سیاسی عدم استحکام کو تقویت ملی۔ انہوں نے کہا کہ عوام نے حالیہ انتخابات میں کانگریس کو پانچ سال کے لیے واضح مینڈیٹ دیا ہے اور حکومت اپنی مدت مکمل کرے گی۔
انہوں نے وزیر اعظم نریندر مودی پر بھی تنقید کرتے ہوئے کہا کہ مرکزی ایجنسیوں کے مبینہ استعمال پر ملک بھر میں بحث جاری ہے، تاہم کانگریس اور اس کی قیادت کسی دباؤ یا دھمکی کے آگے جھکنے والی نہیں۔
وزیر اعلیٰ نے اپوزیشن رہنماؤں پر زور دیا کہ وہ منفی سیاست کے بجائے تعمیری اپوزیشن کا کردار ادا کریں اور ریاست کی ترقی میں تعاون کریں۔ انہوں نے کہا کہ کرناٹک میں کانگریس کی قیادت برقرار رہے گی اور عوامی مینڈیٹ کا احترام کیا جائے گا۔