نئی دہلی ، 23/ اگست (ایس او نیوز /ایجنسی)شیو سینا (یو بی ٹی) کی رکن پارلیمنٹ پرینکا چترویدی نے ہندوستان اور پاکستان کے میچ کی لائیو اسٹریمنگ اور نشریات روکنے کے لیے اطلاعات و نشریات اور آئی ٹی کے وزیر کو خط لکھا ہے۔ سوشل میڈیا پر خط کا اشتراک کرتے ہوئے رکن پارلیمنٹ نے کہا کہ وہ امید کرتی ہیں کہ حکومت وہی کرے گی جس کی ملک کو اپنی حکومت سے توقع ہے۔ اپنے خط میں انہوں نے کہا کہ یہ خط بطور رکن پارلیمنٹ نہیں بلکہ ایک شہری کے طور پر لکھا ہے۔ انہوں نے کہا کہ ہندوستان نے پاکستان کو دنیا میں بے نقاب کرنے کے لیے ایک وفد بھیجا جس میں وہ بھی شامل تھیں۔ ایسے میں ہندوستان  کا پاکستان کے ساتھ میچ کھیلنے کا فیصلہ اسے قبول نہیں۔

پرینکا چترویدی نے کہا، "یہ انتہائی مایوس کن ہے کہ بی سی سی آئی اور وزارت کھیل ایشیا کپ اور پاکستان کے خلاف میچ میں ہندوستان کی شرکت پر اٹل ہیں۔ اسپورٹس مین شپ کے بہانے اس میچ کو ہونے دینا دہشت گردی پھیلانے والے ملک کے خلاف کھڑے ہونے کی اخلاقی ہمت کی کمی کو ظاہر کرتا ہے۔"

اپنے خط میں، انہوں نے مزید لکھا، "دنیا کی تاریخ ایسی مثالوں سے بھری پڑی ہے جہاں ممالک نے کھیلوں پر اصولوں کا انتخاب کیا، جیسا کہ نسل پرستانہ دور میں جنوبی افریقہ کا بائیکاٹ، کئی دہائیوں سے جاری اولمپکس کا بائیکاٹ اور حال ہی میں متعدد منظوریوں کے باوجود پاکستان ہاکی ٹیم کا ایشیا ہاکی کپ میں ہندوستان میں کھیلنے سے انکار۔‘‘

شیو سینا (یو بی ٹی)  کی رکن پارلیمنٹ  نے کہا کہ ہندوستان کے لوگ ایسا میچ نہیں دیکھنا چاہتے جس سے 140 کروڑ شہریوں کے درد اور غصےمیں اضافہ ہو ۔ ہم حب الوطنی کو مختلف حصوں میں تقسیم نہیں کر سکتے۔ جب سرحد پار دہشت گردی میں اب بھی جانیں ضائع ہو رہی ہیں۔ جب ہمارے فوجی پاکستان کی سرپرستی میں ہونے والی دہشت گردی کے خاتمے کے لیے اپنی جانوں کا نذرانہ پیش کر رہے ہیں، حکومت کرکٹ میچوں کی براہ راست نشریات جاری رکھ کر اس سانحے کو معمول پر لا رہی ہے اور کمرشلائز کر رہی ہے۔ قومی مفاد اور عوامی جذبات کو مدنظر رکھتے ہوئے تمام او ٹی ٹی پلیٹ فارمز، ویب سائٹس اور ایپس پر ہندوستان اور پاکستان کےمیچ کی لائیو سٹریمنگ کو روکنا ضروری ہے۔