بنگلورو ، 21/ مئی (ایس او نیوز /ایجنسی) ریاست کرناٹک میں اسٹارٹ اپس اور اختراعی کاروباری منصوبوں کو فروغ دینے کے مقصد سے حکومت کی جانب سے شروع کی گئی ’’ایلیویٹ‘‘ اسکیم کو دس سال مکمل ہوگئے ہیں۔ اس موقع پر محکمۂ الیکٹرانکس، انفارمیشن ٹیکنالوجی اور بایوٹیکنالوجی نے اسکیم کے 25ویں مرحلے کے تحت نئی درخواستیں طلب کرنے کا اعلان کیا ہے۔

بنگلورو ، 21/ مئی (ایس او نیوز /ایجنسی) ریاست کرناٹک میں اختراعی کاروباری منصوبوں اور نئی ٹیکنالوجی پر مبنی اسٹارٹ اپس کی حوصلہ افزائی کے لیے حکومت کی جانب سے شروع کی گئی ’’ایلیویٹ‘‘ اسکیم نے دس سال مکمل کرلیے ہیں۔ اس موقع پر محکمۂ الیکٹرانکس، انفارمیشن ٹیکنالوجی اور بایوٹیکنالوجی نے اسکیم کے 25ویں مرحلے کے تحت نئے اسٹارٹ اپس سے درخواستیں طلب کرنے کا اعلان کیا ہے۔

یہاں جاری اخباری بیان کے مطابق ’’ایلیویٹ‘‘ اسکیم کے تحت منتخب اسٹارٹ اپس کو ایک مرتبہ کے لیے 50 لاکھ روپے تک کی مالی امداد فراہم کی جائے گی، تاکہ وہ اپنے اختراعی منصوبوں، ابتدائی نمونوں اور جدید تکنیکی تصورات کو عملی شکل دے سکیں۔ اس مرحلے کے لیے آن لائن درخواستیں 25 مئی 2026 سے قبول کی جائیں گی۔

حکومت نے پہلی مرتبہ اس اسکیم کو چار الگ الگ زمروں میں تقسیم کرتے ہوئے ریاست کے مختلف طبقات اور علاقوں سے تعلق رکھنے والے اسٹارٹ اپس کو یکساں مواقع فراہم کرنے کی کوشش کی ہے۔

ریاستی وزیر برائے الیکٹرانکس، آئی ٹی اور بایوٹیکنالوجی  پریانک کھرگے  نے اس موقع پر کہا کہ گزشتہ دس برسوں کے دوران ’’ایلیویٹ‘‘ پروگرام نے ریاست میں اختراع، ٹیکنالوجی اور اسٹارٹ اپ کلچر کو مضبوط بنانے میں اہم کردار ادا کیا ہے۔ انہوں نے کہا کہ اس مرتبہ چار الگ زمروں میں امداد فراہم کیے جانے سے ریاست بھر کے نوجوان کاروباری افراد کو فائدہ پہنچے گا۔

اس سال درج ذیل چار زمروں میں درخواستیں طلب کی گئی ہیں۔ ان میں ’’ایلیویٹ جنرل‘‘ تمام شعبوں کے اسٹارٹ اپس کے لیے کھلا زمرہ ہے، ’’ایلیویٹ شکتی‘‘ کم از کم 51 فیصد خواتین کی ملکیت والے اسٹارٹ اپس کے لیے مخصوص ہے، ’’ایلیویٹ اُنتی‘‘ درج فہرست ذاتوں اور درج فہرست قبائل سے تعلق رکھنے والے بانیوں کے لیے خصوصی زمرہ ہے، جبکہ ’’ایلیویٹ اسپائر‘‘ ریاست کے ٹائر-2 اور ٹائر-3 شہروں اور قصبوں کے اسٹارٹ اپس کی حوصلہ افزائی کے لیے متعارف کرایا گیا ہے۔

محکمہ کے مطابق گزشتہ دس برسوں میں ’’ایلیویٹ‘‘ اسکیم کے تحت 24 مراحل میں 1250 سے زائد اسٹارٹ اپس کو تقریباً 292.57 کروڑ روپے کی مالی امداد فراہم کی جاچکی ہے۔ ان میں 330 خواتین کی قیادت والے اداروں کو 77.39 کروڑ روپے جبکہ بنگلورو سے باہر کے 464 اسٹارٹ اپس کو 102.89 کروڑ روپے کی امداد دی گئی۔

بیان میں کہا گیا ہے کہ مالی امداد کے علاوہ اس پروگرام کے تحت رہنمائی، تربیتی سہولتیں، کاروباری روابط، سرکاری تعاون یافتہ مراکزِ امتیاز اور ٹیکنالوجی بزنس اِنکیوبیٹرز تک رسائی بھی فراہم کی جاتی ہے۔

حکومت نے مزید واضح کیا کہ یہ اسکیم ’’کرناٹک اسٹارٹ اپ پالیسی 2022-27‘‘ کے مطابق چلائی جارہی ہے، جس کے تحت اسٹارٹ اپس کو پیٹنٹ اخراجات، تشہیری سرگرمیوں، جی ایس ٹی اور معیاری سرٹیفکیشن اخراجات پر بھی باز ادائیگی اور خصوصی مراعات فراہم کی جاتی ہیں۔

ریاستی وزیر  پریانک کھرگے   نے کہا کہ ’’ایلیویٹ‘‘ پروگرام آج ملک کے کامیاب ترین اسٹارٹ اپ پلیٹ فارمز میں اپنی الگ پہچان بنا چکا ہے اور اس اسکیم کے ذریعے  کرناٹک  نے ہندوستان کے اہم اسٹارٹ اپ مرکز کے طور پر اپنی حیثیت کو مزید مستحکم کیا ہے۔