بھٹکل، 25 جون (ایس او نیوز): الیکشن کمیشن آف انڈیا کی جانب سے 2026 کی ووٹر فہرست کی خصوصی جامع نظرثانی مہم کے تحت بھٹکل اسمبلی حلقہ میں 30 جون سے 29 جولائی تک گھر گھر جا کر ووٹروں کی تفصیلات کی تصدیق کی جائے گی۔ یہ بات اسسٹنٹ کمشنر جے مہیش نے جمعرات کو بھٹکل میں اپنے دفتر میں منعقدہ پریس کانفرنس سے خطاب کرتے ہوئے بتائی۔
انہوں نے کہا کہ ووٹر فہرست کی خصوصی نظرثانی مہم 20 جون سے 7 اکتوبر تک جاری رہے گی۔ اس سلسلے میں 20 سے 29 جون تک ابتدائی تیاریوں، تربیتی پروگراموں اور ضروری دستاویزات کی طباعت کا کام انجام دیا جا رہا ہے۔
مہیش کے مطابق ووٹر فہرست کا مسودہ 5 اگست کو شائع کیا جائے گا، جبکہ دعوے اور اعتراضات داخل کرنے کے لیے 4 ستمبر تک مہلت دی جائے گی۔ حتمی ووٹر فہرست 7 اکتوبر کو جاری کی جائے گی۔
انہوں نے بتایا کہ اس مہم کے لیے حلقہ میں ایک الیکٹورل رجسٹریشن آفیسر، دو اسسٹنٹ الیکٹورل رجسٹریشن آفیسرز اور 252 بوتھ لیول افسران (بی ایل اوز) تعینات کیے گئے ہیں۔ اس کے علاوہ نگرانی کے لیے سپروائزرس بھی مقرر کیے گئے ہیں۔
اسسٹنٹ کمشنر نے کہا کہ بھٹکل اسمبلی حلقہ میں اس وقت مجموعی طور پر 2,31,778 رجسٹرڈ ووٹر موجود ہیں اور نظرثانی کا عمل جاری ہے۔ ان میں سے 94.90 فیصد ووٹروں کا اندراج اور تصدیقی عمل مکمل کیا جا چکا ہے۔
پریس کانفرنس میں فراہم کردہ اعداد و شمار کے مطابق حلقہ میں 1,41,947 مرد اور 1,32,719 خواتین ووٹر ہیں۔ ان میں سے 89,831 مرد اور 87,230 خواتین ووٹر مردم شماری اور تصدیقی عمل میں شامل ہو چکے ہیں۔
گھر گھر سروے کے دوران بوتھ لیول افسران ووٹروں میں اندراجی فارم تقسیم کریں گے۔ ووٹروں سے کہا گیا ہے کہ وہ فارم پُر کرکے مطلوبہ دستاویزات کے ساتھ متعلقہ بی ایل اوز یا ووٹر سہولت مراکز میں جمع کرائیں۔
مہیش نے عوام سے اپیل کی کہ وہ گھر گھر تصدیقی مہم کے دوران انتخابی عملے کے ساتھ مکمل تعاون کریں اور درست معلومات فراہم کرکے ووٹر فہرستوں کی درستگی کو یقینی بنانے میں اپنا کردار ادا کریں۔