ممبئی ، 30/ستمبر (ایس او نیوز /ایجنسی  )’آئی لو محمد‘کے پوسٹروں کا معاملہ اب مہاراشٹر کے اہلیا نگر (احمد نگر) تک پہنچ گیا ہے، جہاں سڑک پر شرپسندوں کے ذریعہ پینٹ ‘آئی لو محمد’ رنگولی کو لے کر زبردست ہنگامہ ہوگیا۔ پولیس کو صورتحال پر قابو پانے کے لیے ہلکی طاقت کا استعمال کرنا پڑا اور تقریباً 30 افراد کو حراست میں لے لیا گیا۔

پولیس کے مطابق کچھ نامعلوم شرپسندوں نے سڑک پر رنگولی ‘آئی لو محمد’ پینٹ کیا۔ مسلم کمیونٹی کے لوگوں نے اسے پیغمبر اسلام کی توہین سمجھا اور سینکڑوں لوگ شہر کے کوتوالی پولیس اسٹیشن کے باہر احتجاج کے لیے جمع ہوئے۔ مظاہرین نے الزام لگایا کہ اس اقدام سے ان کے مذہبی جذبات مجروح ہوئے ہیں۔

صورتحال کی سنگینی کو سمجھتے ہوئے پولیس انتظامیہ فوری طور پر حرکت میں آگئی۔ پولیس نے فوری طور پر نوٹس لیتے ہوئے رنگولی بنانے والے دو افراد کی شناخت کرکے ان کے خلاف مقدمہ درج کر لیا۔ ایک ملزم کو حراست میں لے لیا گیا ہے، مزید تفتیش جاری ہے۔

دریں اثنا سینئر پولیس افسران نے بھیڑ کو پرسکون کرنے کی کوشش کی، لیکن ہجوم کے اندر موجود کچھ لوگوں نے ہنگامہ جاری رکھا۔ پولیس کو حالات پر قابو پانے اور بھیڑ کو منتشر کرنے کے لیے کچھ مقامات پر ہلکی طاقت کا استعمال کرنا پڑا۔ پولیس اب تک 30 افراد کو حراست میں لے چکی ہے۔

اس وقت شہر میں سیکورٹی بڑھا دی گئی ہے، اور پولیس کے انتظامات کئے گئے ہیں۔ پولیس نے عوام سے اپیل کی ہے کہ وہ کسی بھی افواہ پر یقین نہ کریں، کیونکہ حالات اب قابو میں ہیں۔