بنگلورو / کوڈگو، 20 مئی ( ایس او نیوز/ایجنسی)کرناٹک کے مشہور دوبارے ہاتھی کیمپ میں ایک افسوسناک حادثے میں تمل ناڈو سے تعلق رکھنے والی 33 سالہ سیاح تولسی ہاتھیوں کی آپسی لڑائی کے دوران ہلاک ہو گئی۔

تفصیلات کے مطابق واقعہ اس وقت پیش آیا جب دو تربیت یافتہ ہاتھیوں “کانجن” اور “مارتھانڈ” کو نہلایا جا رہا تھا۔ اسی دوران دونوں ہاتھیوں میں اچانک جھڑپ شروع ہو گئی۔ مہاوتوں کی کوششوں کے باوجود ہاتھیوں کو قابو نہیں کیا جا سکا اور ایک ہاتھی نے دوسرے پر حملہ کر دیا۔

حکام کے مطابق جھڑپ کے دوران ہاتھی مارتھانڈ اپنا توازن کھو بیٹھا اور نیچے گر گیا، جس کے نتیجے میں قریب کھڑی خاتون سیاح اس کے نیچے آ کر موقع پر ہی دم توڑ گئی۔ واقعے کے بعد کیمپ میں خوف و ہراس پھیل گیا۔

محکمہ جنگلات کے حکام نے بتایا کہ سیاح خاتون اس وقت دریا کے کنارے کھڑی ہو کر ہاتھیوں کو نہلائے جانے کا منظر دیکھ رہی تھی۔ واقعے میں ملوث دونوں ہاتھی تربیت یافتہ تھے، تاہم اچانک اشتعال کے باعث صورتحال قابو سے باہر ہو گئی۔

ریاستی وزیر برائے جنگلات، ماحولیات و ماحولیات تحفظ ایشر کھنڈرے نے واقعے پر گہرے رنج و غم کا اظہار کرتے ہوئے مکمل تحقیقات کا حکم دیا ہے۔ انہوں نے کہا کہ یہ واقعہ انتہائی افسوسناک اور دل دہلا دینے والا ہے۔

انہوں نے مزید کہا کہ جنگلی جانوروں کے رویے کی مکمل پیشگوئی ممکن نہیں، اس لیے سیاحوں کی حفاظت اولین ترجیح ہونی چاہیے۔ وزیر نے ہدایت دی کہ ہاتھیوں کے قریب جانے، انہیں چھونے، کھلانے یا ان کے ساتھ تصاویر لینے جیسی سرگرمیوں پر سخت پابندی عائد کی جائے اور محفوظ فاصلے کو یقینی بنایا جائے۔

محکمہ جنگلات نے متاثرہ خاندان کو 20 لاکھ روپے معاوضہ دینے کا اعلان کیا ہے اور واقعے کی جامع تحقیقات شروع کر دی گئی ہیں۔ حکام کا کہنا ہے کہ مستقبل میں ایسے واقعات سے بچنے کے لیے کیمپوں میں حفاظتی قواعد مزید سخت کیے جائیں گے۔