بھٹکل 2/اگست (ایس او نیوز) : عوامی امن و امان اور قانون و نظم کے لیے خطرہ بننے کے الزام میں بھٹکل تعلقہ کے ہیبلے گاندھی نگر کے رہائشی 33 سالہ راوڈی شیٹر جگدیش واسو موگیر کو چھ ماہ کے لیے ضلع اتر کنڑا سےتڑی پار کر دیا گیا ہے۔
پولیس کے مطابق جگدیش موگیر کے خلاف مجموعی طور پر چھ فوجداری مقدمات زیر سماعت ہیں، جن میں حملہ، دھمکی، اقدامِ قتل اور درج فہرست ذاتوں و قبائل (انسدادِ مظالم) ایکٹ کے تحت درج مقدمات شامل ہیں۔ ان میں سے پانچ مقدمات بھٹکل رورل پولیس اسٹیشن اور ایک مقدمہ مرڈیشور پولیس اسٹیشن میں درج ہے۔
بھٹکل رورل پولیس انسپکٹر کی سفارش پر مجاز اتھارٹی نے کرناٹک پولیس ایکٹ کی دفعہ 55(A)(B) کے تحت جگدیش موگیر کو فوری طور پر چھ ماہ کے لیے ضلع اتر کنڑا سے بے دخل کرتے ہوئے میسورو شہر کے اشوک پورم پولیس اسٹیشن کی حدود میں رہنے کا حکم جاری کیا۔
پولیس نے بتایا کہ عدالتی حکم پر عمل درآمد کرتے ہوئے جگدیش موگیر کو میسورو منتقل کرکے اشوک پورم پولیس اسٹیشن کے حکام کے حوالے کر دیا گیا۔