نئی دہلی، 21 اگست (ایس او نیوز / ایجنسی) بدھ کو مرکزی وزیر داخلہ امیت شاہ نے آئین میں 130ویں ترمیم پیش کی، جس میں یہ تجویز رکھی گئی ہے کہ وزیر اعظم، وزرائے اعلیٰ اور ملک بھر کے وزراء اگر سنگین الزامات میں گرفتار ہوکر 30 دن تک جیل میں رہیں تو انہیں عہدے سے ہٹا دیا جائے۔

ایسوسی ایشن فار ڈیموکریٹک ریفارمز (اے ڈی آر) کے تجزیے کے مطابق ملک کے تقریباً 42 فیصد وزرائے اعلیٰ نے اپنے انتخابی حلف ناموں میں مجرمانہ مقدمات درج ہونے کا اعتراف کیا ہے۔ یہ انکشاف اس وقت سامنے آیا ہے جب اپوزیشن نے نریندر مودی حکومت پر آمریت (Dictatorship) مسلط کرنے کا الزام لگایا ہے کہ ایسے بل لاکر منتخب نمائندوں کو ہٹایا جا سکتا ہے، چاہے وہ عدالت سے مجرم ثابت نہ بھی ہوئے ہوں۔

دسمبر 2024 میں اے ڈی آر کی رپورٹ کے مطابق کل 31 وزرائے اعلیٰ میں سے 13 پر مجرمانہ مقدمات درج ہیں۔ ان میں سے 10 وزرائے اعلیٰ سنگین الزامات جیسے قتل کی کوشش، اغوا، رشوت خوری اور مجرمانہ دھمکی کے معاملات کا سامنا کر رہے ہیں۔ ان 10 میں سے 7 وزرائے اعلیٰ اپوزیشن کے زیر اقتدار ریاستوں کے ہیں، 2 بی جے پی اتحادیوں سے اور 1 براہِ راست بی جے پی سے تعلق رکھتے ہیں۔

اپوزیشن کا کہنا ہے کہ یہ ترمیم خطرناک ہے کیونکہ اس کے تحت کسی بھی منتخب نمائندے کو صرف گرفتاری اور الزامات کی بنیاد پر ہٹایا جا سکتا ہے، چاہے ابھی سزا نہ ہوئی ہو۔

اے ڈی آر نے یہ بھی واضح کیا ہے کہ اکثر سیاست دانوں پر احتجاجی مظاہروں جیسے معاملات میں بھی مقدمے درج ہوتے ہیں اور کئی بار سیاسی انتقام کے تحت بھی کیسز قائم کیے جاتے ہیں۔ مثال کے طور پر اتر پردیش کے وزیر اعلیٰ آدتیہ ناتھ پر الزام ہے کہ انہوں نے اپنے خلاف مقدمات پولیس کے ذریعے ختم کروائے۔

اے ڈی آر کے مطابق وزرائے اعلیٰ کے خلاف جن سنگین جرائم کی فہرست بنی ہے، ان میں وہ مقدمات شامل ہیں جن کی سزا پانچ سال یا اس سے زیادہ ہو، ناقابل ضمانت و قابل دست اندازی پولیس ہوں، انتخابی بدعنوانی سے جڑے ہوں، قومی خزانے کے نقصان سے متعلق ہوں یا خواتین و بچوں کے خلاف جرائم پر مبنی ہوں۔

یہ تمام اعداد و شمار اے ڈی آر کی رپورٹ "موجودہ وزرائے اعلیٰ کا تجزیہ: 28 ریاستی اسمبلیاں اور 3 مرکز کے زیرانتظام علاقے 2024" سے لیے گئے ہیں۔