لندن ، 16/فروری(ایس او نیوز/ایجنسی)برطانیہ کی نئی ملکہ شاہ چارلس IIIکی اہلیہ کیملا تاجپوشی کے دوران ملکہ الزبتھ کا کوہ نور والا تاج نہیں پہنیں گی- لندن میں بکنگھم پیلس نے منگل کو یہ اعلان کیا- بی بی سی کے مطابق شاہی خاندان نے یہ فیصلہ اس بات کو مدنظر رکھتے ہوئے کیا ہے کہ ہندوستان کے ساتھ تعلقات خراب نہ ہوں - اس فیصلے کے بعد ملکہ میری کا 100سال پرانا تاج کیملا کیلئے تیار کیا جا رہا ہے- کیملا کو باضابطہ طور پر ملکہ کا درجہ دینے کیلئے کوئین کنسورٹ 6مئی کو وہاں موجود ہوں گی- اس دوران وہ نیا تاج پہنیں گی- اطلاعات کے مطابق، شاہی خاندان نے ملکہ میری کے تاج کو کیملا کے سر کے مطابق تبدیل کرنے کیلئے بھیجا ہے-

ہندوستان کئی بار کوہ نور واپس مانگ چکا ہے-ملکہ کا تاج دنیا کے بہت سے قیمتی ہیروں اور جواہرات سے جڑا ہوا ہے، بشمول کوہ نور اور افریقہ کا عظیم ستارہ- اس کی قیمت تقریباً 400ملین ڈالر بتائی گئی ہے- ہندوستان کئی بار برطانیہ کے سامنے کوہ نور ہیرے پر اپنے قانونی حق کادعویٰ کر چکا ہے- ہندوستان کی طرح افریقہ نے بھی کئی بار برطانیہ کے شاہی تاج میں جڑے اپنے قیمتی ہیروں کی واپسی کا مطالبہ کیا ہے-

ملکہ میری کے تاج میں کیملا کیلئے نئے ہیرے ہوں گے-برطانیہ کی تاریخ میں پہلی بار شاہی تاج یعنی امپیریل اسٹیٹ کراؤن کی جگہ کچھ تبدیلیوں کے ساتھ ایک پرانا تاج دوبارہ استعمال کیا جائے گا- ملکہ الزبتھ کو خراج تحسین پیش کرنے کیلئے اس کے Cullinan III، IV اور Vہیرے تاج میں شامل کیے جائیں گے- یہ تاج 100سال سے زیادہ پرانا ہے اور اسے پہلی بار 1911میں ملکہ میری نے پہنایا تھا-

برطانیہ میں کوہ نور کا تاج صرف ملکہ ہی پہنتی رہی ہے-ملکہ الزبتھ کی موت کے بعد ان کے بڑے بیٹے چارلس کو بادشاہ قرار دیا گیا- ان کی اہلیہ کیملا کو ملکہ بنا دیا گیا ہے- کیملا کو اب6مئی کو ایک تقریب میں باضابطہ طور پر ملکہ کا تاج پہنایا جائے گا- کیملا اس تقریب میں الزبتھ کے کوہ نور تاج کی بجائے ملکہ میری کا تاج پہنیں گی-