آ ئین وجمہوریت کی بقاء کے لئے قائم فورم کی وزیر اعلیٰ سدرامیا سے ملاقات؛ سیکولر ووٹوں کو تقسیم ہو نے سے روکنے کا مطالبہ
بنگلورو۔29؍مارچ(ایس او نیوز) آ نے والے اسمبلی انتخابات میں سیکولر ووٹوں کو کسی بھی حال میں تقسیم نہ ہونے دینے کا مطالبہ کرتے ہوئے آئین و جمہوریت کی حفاظت کے لئے قائم فورم کے ایک وفد نے سابق ریاستی وزیر اور بزرگ دانشور اے کے سبیا کی قیادت میں وزیراعلیٰ سدرامیا سے ملاقات کی۔ انہوں نے سدرامیا سے کہا کہ وہ اس بات کو یقینی بنائیں کہ آنے والے انتخابات میں سیکولر ووٹ کسی بھی حال میں تقسیم نہ ہونے پائیں ۔انہوں نے کہاکہ سبھی سیکولر سیاسی جماعتوں سے ان کا فورم فرقہ وارانہ ہم آہنگی اور امن وامان کے لئے کام کررہا ہے۔
بتایا گیا ہے کہ سابق وزیر اے کے سبیا کی قیادت میں یہ فورم تمام سیاسی جماعتوں کے نمائندوں سے ملاقات کررہا ہے۔ وزیر اعلیٰ سے ملاقات کے دوران وفد نے ان سے گزارش کی کہ فرقہ پرست طاقتوں کی سرگرمیوں پر سختی سے روک لگائے۔ وزیراعلیٰ سدرامیا نے ان مطالبات کو منظور کرتے ہوئے کہاکہ سیکولر ووٹوں کو تقسیم کرنے پر تلی ہوئی جے ڈی ایس جیسی سیاسی جماعتوں پر نظر رکھنے کی ضرورت ہے۔ انہوں نے جنتادل (ایس) کے ساتھ مفاہمت کی تجویز کو مسترد کرتے ہوئے کہاکہ فی الوقت اس پر کوئی بھی فیصلہ وہ اپنے طور پر نہیں لے سکتے۔ اے کے سبیا نے وزیراعلیٰ کو بتایاکہ حال ہی میں انہوں نے جنتادل (ایس) سربراہ دیوے گوڈا سے ملاقات کرکے بات چیت کی اور ان سے گزارش کی کہ سیکولر ووٹوں کو تقسیم ہونے سے روکنے کے لئے تعاون کیا جائے ، تاہم دیوے گوڈا نے جہاں غور کرنے کا یقین دلایا وہیں کمار سوامی نے اس کی مخالفت کی ، جس کی وجہ سے بات چیت ادھوری رہ گئی۔اے کے سبیا نے کہا کہ ان کی طرف سے یہ جدوجہد نہیں رکے گی آنے والے دنوں میں بھی جاری رہے گی۔ اب نہ سہی آنے والے دنوں میں فرقہ پرست طاقتوں کو روکنے کے لئے کانگریس اور جنتادل (ایس) کو ایک ساتھ کام کرنا چاہئے۔ ورنہ ریاست میں فرقہ پرست طاقتوں کو ہرانا مشکل ہوجائے گا۔ کمیٹی کے لیڈر کے ایل اشوک نے بتایاکہ اے کے سبیا اور کمیٹی کے دیگر اراکین نے وزیراعلیٰ سدرامیا سے یہی گزارش کی ہے کہ کسی بھی حال میں سیکولر ووٹوں کو تقسیم نہ ہونے دیا جائے اور ریاست کو فرقہ پرستی کی طرف لے جانے کے درپے قوتوں کو شکست دی جائے۔