ریاستی وزارت سے مہیش کا استعفیٰ منظور
بنگلورو،15؍اکتوبر(ایس او نیوز) پانچ ریاستوں کے اسمبلی انتخابات میں کانگریس اور بی ایس پی کے درمیان مفاہمت کی کوشش ناکام ہوجانے کے نتیجے میں ریاستی کابینہ سے استعفیٰ دینے والے بی ایس پی کے وزیر این مہیش کو استعفیٰ واپس لینے کے لئے منانے میں جے ڈی ایس قیادت کی کوشش ناکام ہوجانے کے بعد آج وزیراعلیٰ نے مہیش کا استعفیٰ منظوری کے لئے گورنر کو روانہ کردیا اور گورنر نے استعفیٰ منظور بھی کرلیا۔ قومی سطح پر ہورہی سیاسی تبدیلیوں کے پیش نظر مہیش نے وزارت سے استعفیٰ دے دیا۔ اس کے بعد بھی وزیر اعلیٰ ایچ ڈی کمارسوامی اور کانگریس کے چند لیڈروں نے مہیش کو اس بات کے لئے منانے کی کوشش کی کہ وہ ریاستی سطح پر جو حالات ہیں ان کی بنیاد پر اپنے استعفے کے فیصلے کو واپس لینے پر غور کریں۔
تاہم بتایاجاتاہے کہ بی جے پی کے قومی جنرل سکریٹری ستیش مشرا نے خود وزیراعلیٰ ایچ ڈی کمارسوامی کو فون کرکے گزارش کی کہ وہ ریاستی کابینہ سے مہیش کے استعفے کو منظور کرلیں۔اس گزارش کے بعد وزیر اعلیٰ نے مہیش کا استعفیٰ منظوری کے لئے گورنر کو روانہ کردیا۔ وزیر اعلیٰ نے خود استعفیٰ منظور کئے جانے کی تصدیق کرتے ہوئے بتایاکہ استعفے کے باوجود ریاست میں جے ڈی ایس کے ساتھ بی ایس پی کا اتحاد برقرار رہے گا اور مہیش کے استعفے سے مخلوط حکومت کے استحکام پر کوئی اثر نہیں پڑے گا۔ انہوں نے کہاکہ قومی سطح پر پیش آرہے چند سیاسی واقعات کی وجہ سے بی ایس پی کی سربراہ مایاوتی نے مہیش کو استعفٰیٰ دینے کی ہدایت دی ہے اور پارٹی کے ایک وفادار سپاہی ہونے کا ثبوت دیتے ہوئے مہیش نے وزارت سے استعفیٰ دیاہے، یہ ان کی پارٹی کا داخلی معاملہ ہے اسی لئے وہ اس پر زیادہ بحث کا حصہ بننا مناسب نہیں سمجھتے۔