راجہ راجیشوری نگر میں کانگریس۔جے ڈی ایس تنازعہ، میئر پدماوتی پر سدرامیا برہم
بنگلورو:22/مئی (ایس او نیوز) شہر کے راجہ راجیشوری نگر اسمبلی حلقہ میں دو دن قبل ہوئے رکن اسمبلی اور کارپوریٹر کے جھگڑے کے سلسلے میں آج وزیر اعلیٰ سدرامیا نے میئر جی پدماوتی کو آڑے ہاتھوں لیا۔ آج صبح ودھان سودھا کے روبرو بی بی ایم پی کی صفائی مشینوں کے اجراء کے سلسلے میں منعقدہ تقریب کے دوران جیسے ہی میئر کا وزیر اعلیٰ سدرامیا سے سامنا ہوا، سدرامیا نے راجہ راجیشوری نگر کی گڑبڑ کے متعلق میئر سے باز پرس کی۔ انہوں نے پوچھاکہ کارپوریٹر منجولانارائن سوامی اور رکن اسمبلی منی رتنا کے حامیوں کے درمیان گڑ بڑ کیوں ہوئی؟ جس پروگرام میں خود وزیر اعلیٰ شریک ہوں اس پروگرام میں گڑ بڑ کو روکنے کیلئے احتیاطی قدم کیوں نہیں اٹھایا گیا۔ کیا میئر کی یہ ذمہ داری نہیں ہے؟۔ انہوں نے کہا کہ بی بی ایم پی میں کانگریس اور جنتادل (ایس) کے درمیان مفاہمت ہے اس سے واقفیت کے باوجود بھی اگر اس طرح کے واقعات رونما ہوں تو اس کیلئے ذمہ دار کون ہے؟۔ انہوں نے کہا کہ ایسے واقعات سے کانگریس پارٹی کی ساکھ کو نقصان پہنچے گا۔ بی بی ایم پی کی طرف سے جب پروگرام منعقد کیاجارہاہے تو تمام کو اعتماد میں لے کر کام کرنا چاہئے۔آئندہ اس طرح کی لاپرواہی برداشت نہیں کی جائے گی۔ وزیر اعلیٰ سدرامیا کی برہمی پر میئر پدماوتی خود سشدر رہ گئیں۔ بعد میں میئر نے وزیر اعلیٰ سدرامیا کو اس واقعہ کی وجوہات کے بارے میں تفصیلات پیش کیں۔
