پتور: شمالی کرناٹکا کے ایک مزدور نے کی خودکشی
پتور 30؍نومبر (ایس او نیوز) مضافات میں واقع چکّا مدنور گاؤں میں شمالی کرناٹکا سے تعلق رکھنے والے ایک مزدور نے پھانسی لگا کر خود کشی کرلی۔معلوم ہو اہے کہ اپنے آپ کو ہلاک کرنے والے مزدور کا نام شنکرپّا (۶۰سال) ہے جو گدگ ضلع کے شیرہٹی تعلقہ کا رہنے والاتھا۔
بتایاجاتا ہے کہ شنکرپّا بہت عرصے تک یہاں پر ایک فارم میں مزدور کے طور پر کام کررہاتھا۔ پھر وہ ملازمت چھوڑ کر اپنے گاؤں چلاگیا۔ ادھر چند دنوں پہلے وہ پھر سے کام کی تلاش میں یہاں پہنچا مگر اسے کام نہیں ملاتھا۔جمعرات کے دن فارم کے قریب ایک چرواہے نے گائیں چرانے کے دوران اس کی لاش درخت سے لٹکتی ہوئی دیکھی اور اس کی اطلاع مقامی افراد کو دی۔سمجھا جاتا ہے کہ شائد شراب کا عادی شنکرپّا کام نہ ملنے کی وجہ سے ذہنی پریشانی کا شکارہوگیاتھا، جس کی وجہ سے اس نے فارم کے قریب واقع ایک درخت سے پھانسی کا پھندا لگا کر خودکشی کرلی ۔ مہلوک کے فرزند راجیش کی شکایت پر پولیس نے کیس درج کرلیا ہے۔