بنگلورو، 9فروری (ایس او نیوز؍یو این آئی) کرناٹک کے وزیر اعلی اور جنتا دل (ایس) کے رہنما ایچ ڈی کمارسوامي نے وزیر اعظم نریندر مودی کو آڑے ہاتھوں لیتے ہوئے ان پر ریاستی حکومت کی جانب سے کسانوں کے قرض معافی اسکیم کے سلسلے میں پارلیمنٹ اور ملک کو گمراہ کرنے کا الزام لگایا گیا ہے ۔

مسٹر کمارسوامي نے جلد بازی میں بلائی گئی ایک پریس کانفرنس میں مسٹر مودی کے جمعرات کو پارلیمنٹ میں دیئے گئے اس بیان پر سخت اعتراض کیا جس میں انہوں نے کہا کہ ریاست کے 44 لاکھ کسانوں میں سے اب تک صرف پانچ ہزار کسانوں کے قرض معاف ہوئے ہیں۔ انھوں نے مسٹر مودی کے دعوے کو بڑا جھوٹ بتاتے ہوئے اسے ملک کو گمراہ کرنے والا بھی بتایا ہے ۔

مسٹر کمارسوامي کے مطابق اب تک چار لاکھ سے زائد کسانوں کے قرض معاف کئے جا چکے ہیں اور گزشتہ دو دنوں میں اس سلسلے میں مزید 2000 کروڑ جاری کئے گئے ہیں۔ انہوں نے پارلیمنٹ میں اپوزیشن ارکان سے اس مسئلے کو اٹھانے اور حقیقی تصویر کو اجاگر کرنے کی اپیل کرتے ہوئے مسٹر مودی کی بدنیتی کو بھی اجاگر کرنے کی درخواست کی ہے ۔جنتا دل (ایس) کے لیڈر نے وزیر اعظم پر بدعنوانی کے خلاف لڑنے کے اپنے دعوے پر کاربند نہ رہنے کا الزام لگاتے ہوئے کہا،‘‘مسٹر مودی کی ہدایت پر ہی بی جے پی لیڈروں کی طرف سے کرناٹک میں آپریشن لوٹس چلایا گیا جو ناکام رہا۔