نئی دہلی،2؍اکتوبر(ایس او نیوز؍آئی این ایس انڈیا)اناہزارے پونہ سے براہ راست دہلی پہنچے اور گاندھی جینتی کے موقعہ پر دہلی کے راج گھاٹ پر ستیہ گرہ کر رہے ہیں ،وہ مودی کے عدم ایفائے عہد سے مغموم ہیں اور ایک دن کا ستیہ گرہ کر کے واپس چلے جائیں گے ۔ وہ کہتے ہیں کہ تین سال کے بعد بھی مودی حکومت نے اپنے وعدوں کو پورا نہیں کیا جس کے باعث وہ مایوس ہیں ہے، لوگ مفاد پرست ہوتے ہیں۔انا ہزارے نے وزیر اعظم کو ایک خط لکھا ۔اپنے مکتوب میں کئی امور کی یاد دہانی کرائی ۔انہوں نے لکھا کہ ’’ آج 2 اکتوبر گاندھی جینتی ہے اس مبارک موقعہ پر غور و خوض کرتے ہوئے دل اندر ہی اندر رنجیدہ ہے ۔ ہزارے نے وزیر اعظم کو یاد دہانی کراتے ہوئے لکھا ، آپ نے اپنے انتخابی مہم کے خطابات میں کہا تھا’’بدعنوانی سے پاک ملک بنانے کیلئے لوک پال کے نفاذ کو یقینی بنایا جائے گا ،بیرون ملک میں چھپایا ہوا کالا دھن30دن میں واپس آئے گا ،نوٹ بندی سے ملک میں کالا دھن ختم ہوگا ،کسان کی خود کشی تھمے گی اور ان کی پیداوار میں اضافہ ہوگا ،خواتین کی حفاظت کو یقینی بنائی جائے گی اور اس کے پختہ انتظامات کئے جائیں گے‘‘ ؛ لیکن آپ کی سرکار نے ان تمام امور سے گریز کیاگیااور آج تین سال گذر جانے کے بعد بھی ان پر عمل در آمد نہیں ہوسکا ہے۔انا ہزارے نے سوال کرتے ہوئے لکھا :’’ سردار پٹیل ،بھگت سنگھ وغیرہ لاکھوں مجاہدین آزادی نے کس بھارت کا خواب دیکھا تھا ؟ اگر 70سال گذر جانے کے بعد بھی ملک کی صورتحال بدلی نہیں ہے تو پھر ان لاکھوں مجاہدین کی قربانیاں رائیگاں گئیں؟‘‘ انھوں نے دکھ ظاہر کرتے ہوئے لکھا : جب ملک میں خواتین کے ساتھ ظلم ،کسانوں کی خودکشی اور بڑھتی ہوئی بدعنوانی دیکھتا ہوں تو نہایت افسوس ہوتا ہے ،انھوں نے مزید لکھا: آج گاندھی جینتی ہے ،لیکن ان کے خواب ابھی ادھورا ہی ہے ،آج ان کے یوم پیدائش کے موقعہ پر ان کے قدموں میں ملک کیلئے دعا اور ستیہ گرہ کرنے جا رہا ہوں ۔انھوں نے جہاں ایک طرف وعدہ ہائے گریز کا ذکر کیا ہے وہیں تحریک چلانے کی بات بھی کہی ہے۔