وجے ہزارے ٹرافی:سنچری جماکر دھونی نے ہاری بازی اپنے نام کی
کولکاتہ،27؍فروری(ایس او نیوز؍آئی این ایس انڈیا)ہندوستانی کرکٹ ٹیم کے سابق کپتان مہندر سنگھ دھونی نے اپنی دھماکہ دار سنچری اننگز کی بدولت ہاری بازی اپنے نام کرتے ہوئے جھارکھنڈ کو وجے ہزارے ٹرافی میں پہلی جیت دلائی۔ایڈن گارڈیس میں کھیلے گئے ایک روزہ میچ میں جھارکھنڈ نے چھتیس گڑھ کو 78رنز سے شکست دی۔ٹاس ہار کر پہلے بیٹنگ کرنے اتری جھارکھنڈ کی ٹیم نے مسلسل وکٹ کھوئے، ٹیم کا اسکور جب 14اوورز میں 43رنز پر چار وکٹ تھا تب دھونی بیٹنگ کرنے اترے،تاہم 43رنز پر ہی چوتھا اور پھر 57رنز پر جھارکھنڈ کا چھٹا وکٹ گر گیا،اس کے بعد شہباز ندیم کو لے کر دھونی نے 151رنز کی شراکت داری کی۔دھونی نے صرف 107گیندوں میں 129رنز بنائے،اس میں 10چوکے اور6 فلک بوس چھکے شامل تھے۔دھونی نے ہاف سنچری اور سنچری، دونوں ہی چھکے لگا کر پورے کئے،ہاف سنچری سے سنچری بنانے میں دھونی نے محض 23گیندوں کا سہارا لیا۔شہباز ندیم نے 53رنز بنائے۔ایس گپتا کے ایک اوور میں تو دھونی نے دو چھکے اور دو چوکے کی مدد سے 23رنز بنائے۔مقررہ 50اوورز میں نو وکٹ کے نقصان پر جھارکھنڈ نے 243رنز بنائے،جیت کے لئے 244رنز کا تعاقب کرنے اتری چھتیس گڑھ کی پوری ٹیم 38.4اوورز میں 165رنز پر آل آؤٹ ہو گئی۔دھونی کی اننگز دیکھنے کے لئے اتوار کو ایڈن گارڈن میں تقریباََایک ہزارناظرین کی بھیڑ جمع ہو گئی تھی۔دھونی نے انہیں مایوس نہیں کیا اور اپنے دیرینہ انداز میں پہلی اننگز کو سنوارا اور پھر آخری اووروں میں خطرناک شاٹ کھیلے۔یہ دھونی کا ہی جلوہ تھا کہ میچ ختم ہونے کے قریب ڈیڑھ گھنٹے بعد بھی ناظرین کی بھاری بھیڑ ایڈن کے سامنے دھونی کی ایک جھلک حاصل کرنے کے لئے کھڑی تھی۔