منگلورو11؍دسمبر(ایس او نیوز) مرکزی حکومت نے ملک کے جن 6 انٹرنیشنل ایئر پورٹس کو نجی ٹھیکوں پر دینے(پرائیویٹائزیشن) کا فیصلہ کیا ہے اس میں منگلورو کا ایئرپورٹ بھی شامل ہے۔ مرکزی حکومت کے اس اقدام کے خلاف بطور احتجاج ایئر پورٹ ملازمین کی یونین (AAEU) نے تین دن کی بھوک ہڑتال شروع کردی ہے۔

مزدور یونین (AAEU)کی منگلورو شاخ کے صدر اروند گاؤنکر اور سکریٹری شراون کمار نے بھوک ہڑتال کے آغاز پر احتجاجی مظاہرین سے خطاب کیا۔کاسرگوڈ کے رکن پارلیمان پی کروناکرن نے بھوک ہڑتال پر بیٹھے ہوئے ملازمین سے ملاقات کرتے ہوئے انہیں تیقن دیا کہ وہ اس مسئلے کو لوک سبھا میں اٹھائیں گے اورایئر پورٹس کی نج کاری کے اس اقدام کی مخالفت کریں گے۔

توقع ظاہر کی جارہی ہے کہ آج شہری ہوابازی کے وزیر سریش پربھومنگلورو ایئر پورٹ پر پہنچنے والے ہیں اور ہوسکتا ہے کہ وہ رکن پارلیمان اور ایئر پورٹ افسران کے ساتھ میٹنگ منعقد کریں گے۔ رکن پارلیمان نلین کمار کے تعلق سے معلوم ہواہے کہ وہ وزیر شہری ہوابازی سے ملاقات کرکے ایئر پورٹ سے متعلقہ ترقیاتی کاموں کو انجام دینے کے سلسلے میں میمورنڈم پیش کریں گے۔