کانگریس جے ڈی ایس اتحاد پر کمار سوامی اور دیوے گوڈاسے تبادلۂ خیال
بنگلورو،22؍فروری(ایس او نیوز)آنے والے لوک سبھا انتخابات میں کانگریس اور جے ڈی ایس کے مابین اتحاد کی صورت میں جے ڈی ایس کو کن پارلیمانی حلقوں سے اپنے امیدوار میدان میں اتارنے ہوں گے اس پر آج وزیر اعلیٰ ایچ ڈی کمار سوامی نے پارٹی کے قومی صدر اور سابق وزیراعظم ایچ ڈی دیوے گوڈا سے تبادلۂ خیال کیا۔
کمار سوامی نے پدمانابھا نگر میں دیوے گوڈا کی رہائش گاہ پہنچ کر لوک سبھا انتخابات کے لئے پارٹی کی تیاریوں پر تفصیلی بات چیت کی۔ ریاست میں کانگریس کے ساتھ مفاہمت سے انتخابات لڑنے کی صورت میں دونوں پارٹیوں کو بھاری فائدے کے امکانات کا بھی جائزہ لیا گیا اور طے کیا گیا کہ جلد ہی کانگریس لیڈروں کے ہمراہ ایک میٹنگ طلب کی جائے گی، جس میں سیٹوں کی تقسیم کو قطعیت دی جائے گی۔
جے ڈی ایس نے کانگریس سے مطالبہ کیا ہے کہ اسے کم از کم بارہ حلقے دئے جانے چاہئیں اس سلسلے میں کانگریس کے تذبذب کو دیکھتے ہوئے کل وزیر اعلیٰ ایچ ڈی کمار سوامی نے برہمی کا اظہار کیا تھا اور یہاں تک کہہ دیا تھاکہ سیٹوں کے لئے جے ڈی ایس کانگریس سے بھیک نہیں مانگے کی، اس کے بعد کانگریس کے حلقوں میں ہلچل مچ گئی اور یہ خدشات پیدا ہوگئی کہ لوک سبھا انتخابات کے لئے دونوں پارٹیوں کے اتحاد کہیں خطرے میں نہ پڑ جائے۔ اسے دیکھتے ہوئے آج سابق وزیر اعظم نے کمار سوامی کو فوراً طلب کیا اور انہیں ہدایت دی کہ فوری طور پر ریاست کے کانگریس قائدین کو طلب کیاجائے اور واضح کردیا جائے کہ جلد کانگریس اس مفاہمت کو قطعیت دینے کے لئے آگے آئے۔ سابق وزیراعظم جو ارونا چل پردیش کے دورے پر تھے ، کل انہوں نے وہاں کے سابق وزیراعلیٰ گیگونگ اپانگ سے ملاقات کی، جو حال ہی میں این ڈی اے چھوڑ کر کانگریس کی قیادت والی یوپی اے میں شمولیت اختیار کرلی ہے۔ اس ملاقات کے دوران گنگونگ اپانگ نے باضابطہ جے ڈی ایس میں شمولیت بھی اختیار کرلی اور اس ریاست میں جے ڈی ایس کو مضبوط کرنے کا ذمہ بھی لے لیا ، بتایاجاتاہے کہ دیوے گوڈا اور کمار سوامی نے اس بات پر اتفاق کیا ہے کہ انتخابات میں جے ڈی ایس اپنے لئے ہاسن، منڈیا، میسور، شیموگہ، بنگلور نارتھ، بیدر، اور دیگر پارلیمانی حلقوں کا مطالبہ کانگریس کے سامنے رکھے گی۔ اس ملاقات کے دوران جے ڈی ایس کے اراکین اسمبلی کو سرکاری بورڈز اور کارپوریشنوں کی چیرمین شپ اور دیگر کو وزیراعلیٰ کے سیاسی سکریٹری مقرر کرنے پر بھی تفصیلی بات چیت ہوئی۔