بنگلورو۔6؍نومبر(ایس او نیوز) پی یو سی طلبا کی کالجوں میں حاضری کے متعلق سخت موقف اپناتے ہوئے پری یونیورسٹی ایجوکیشن بورڈ نے ایک نیا منصوبہ اپنایا ہے۔ اس منصوبے کے مطابق والدین کو یہ اختیار رہے گا کہ کالج میں اپنے بچے کی حاضری پر مسلسل نظر رکھیں اور اس سلسلے میں ضرورت پڑنے پر پی یو سی بورڈ کو بھی مطلع کریں ۔

مارچ 2017 کے دوران منعقد کئے گئے پی یو سی امتحان میں 4800 طلبا کو حاضری 25 فیصد سے کم رہنے کی پاداش میں امتحان دینے سے روک دیا گیا۔ اس وجہ سے امتحان سے محروم ہونے والے طلبا نے اپنے والدین کے ساتھ پی یو سی بورڈ کے روبرو احتجاجی مظاہرہ بھی کیا۔ آئندہ اس طرح کے واقعات نہ پیش آئیں یہ یقینی بنانے کیلئے پی یو سی بورڈ نے امتحانات شروع ہونے سے پہلے ہی والدین کو ان کے بچوں کی حاضری کے متعلق مکمل جانکاری دینے اور یہ بھی واضح کردینے کا فیصلہ کیا ہے کہ وہ امتحان لکھ پائیں گے یا نہیں۔ بورڈ نے واضح کردیا ہے کہ 25 فیصد حاضر ی اور 75 فیصد غیر حاضری جن طلبا کی بھی ہوگی کسی بھی حال میں انہیں امتحان میں شامل نہیں کیا جائے گا۔ محکمۂ تعلیمات کی طرف سے اس سلسلے میں تمام کالجوں کو ایک سرکیولر بھی جاری کیاگیا ہے کہ وہ طلبا کی حاضری کے متعلق والدین کو طلب کرکے وقتاً فوقتاً جانکاری دیتے رہیں اور اس موقع پر ان طلبا کی تعلیمی پیش رفت پر بھی والدین سے تبادلۂ خیال کریں۔ اس ضمن میں اگلے تین ماہ کے دوران والدین کے ساتھ تین الگ الگ میٹنگیں کرنے کا حکم دیا گیا ہے۔ حکومت کی طرف سے اس سلسلے میں کالجوں کو تاریخیں بھی مہیا کرائی گئی ہیں اور کہا گیا ہے کہ 30 نومبر31 دسمبر اور31 جنوری کو والدین کے ساتھ میٹنگ کی جائے اور اس میٹنگ کے دوران طلبا کی حاضری کے متعلق تفصیلی جانکاری والدین کو دی جائے اور بتادیا جائے کہ جن طلبا کی حاضری کم ہوگی انہیں پی یو سی بورڈ کی طرف سے کسی بھی حال میں ہال ٹکٹ دیا نہیں جائے گا۔