بنگلورو،7؍مارچ (ایس او نیوز؍ایجنسی) شہر کے لوک ایوکتہ دفتر میں گھس کردن دھاڑے ایک نوجوان کے ذریعے لوک آیوکتہ جسٹس وشواناتھ شیٹی کو چاقو سے حملہ کرکے بری طرح زخمی کرنے کی واردات پیش آئی ہے، جس کے بعد انہیں ملیا اسپتال میں داخل کیا گیا ہے ۔ بتایا گیا ہے کہ حملے میں وہ خطرے سے باہر ہیں۔
ذرائع سے ملی اطلاع کے مطابق ٹمکور کے تیج راج شرما ایک معاملے کے متعلق تفصیلات حاصل کرنے کے نام پر لوک ایوکتہ دفتر داخل ہوا تھا، اور اندر پہنچتے ہی اُس نے جسٹس وشواناتھ شٹی پر حملہ کردیا۔ پولس نے تیج راج شرما کو فوری گرفتارکرلیا ہے اور اس سے پوچھ گچھ جاری ہے ۔
اس سلسلے میں وزیرداخلہ رام لنگا ریڈی نے بتایا کہ گرفتار شدہ نوجوان نے لوک آیکتہ جسٹس وشواناتھ شیٹی کو 3مرتبہ چاقو گھونپا ہے ۔ وزیر اعلیٰ سدارامیا نے لوک آیوکتہ شیٹی پر ہوئے حملہ پر افسوس کا اظہارکرتے ہوئے کہاکہ لوک آیوکتہ پرچاقو سے حملہ کرکے قتل کرنے کی کوشش کی گئی تھی ۔اس معاملہ کی مکمل جانچ کے لئے انہوں نے ڈائرکٹر جنرل وانسپکٹر جنرل آف پولیس نیلامنی این راجو کو حکم دیا ہے ۔ وزیراعلیٰ نے لوک آیوکتہ پر کئے گئے حملہ کے بعد فوری ملیا اسپتال پہنچ کر ان کی عیادت کرتے ہوئے ڈاکٹروں سے تفصیلات حاصل کیں ۔اس کے بعد اخباری نمائندوں سے بات کرتے ہوئے بتایا کہ ملزم کی گرفتاری عمل میں لائی جاچکی ہے ۔ وزیراعلیٰ نے کہا کہ لوک آیوکتہ دفتر پر مناسب حفاظتی انتظامات کئے گئے ہیں ۔اس کے باوجود ملزم لوک آیوکتہ دفتر میں پہنچا جسٹس وشواناتھ شیٹی کے چیمبر میں داخل ہوکر حملہ کیا ۔ انہوں نے مزید بتایا کہ سکیورٹی کے متعلق جولاپروائی ہوئی ہے اس کی جانچ کا بھی انہوں نے حکم دیا ہے۔
انہوں نے بتایا کہ ڈیوٹی کے دوران لاپروائی برتنے والے افراد کے خلاف سخت قانونی کارروائی کی جائے گی۔ وزیراعلیٰ نے کہا کہ انہیں بھی سکیورٹی فراہم کی جاتی ہے ۔ کئی افراد ان سے ملاقات کیلئے دفتر پہنچتے ہیں۔اسی طرح لوک آیوکتہ جسٹس وشواناتھ شیٹی سے ملاقات کے دوران یہ واقعہ پیش آیا ہے ۔ ان کا گن مین دفتر سے باہر موجود تھا۔ انہوں نے بتایا کہ اس معاملہ کی مکمل جانچ کا حکم دیا گیا ہے۔ انہوں نے بتایا کہ جسٹس وشواناتھ شیٹی پرتین سے چار جگہوں پر چاقو سے حملہ کیا گیا ہے ۔ان میں ایک جگہ زخم کافی گہرا ہے۔ انہوں نے ان کی جلد از جلد صحتیابی کی امید کی۔
ملیا اسپتال کے ڈاکٹر دیواکر بھٹ نے بتایا کہ جسٹس وشواناتھ شیٹی خطرہ سے باہر ہیں ۔انہیں 3دن تک انتہائی نگہداشت شعبہ (آئی سی یو) میں رکھا جائے گا۔ انہوں نے بتایا کہ جسٹس وشواناتھ شیٹی کے پیٹ ، سینہ اور دائیں ہاتھ پر حملہ کیا گیا ۔ جہاں سے خون کافی بہہ رہاتھا۔ علاج کے ذریعہ خون کے بہاؤ کو روک دیا گیا ہے ۔اب ان کی حالت بہتر ہے ۔لیکن بات کرنے سے پرہیز کررہے ہیں۔
تقریباً 74 سال کے جسٹس وشواناتھ شیٹی، ذیابیطس کے مرض میں مبتلا ہیں اورایک مرتبہ امراض قلب کا بھی شکار ہوچکے ہیں ۔ اس لئے اسپتال میں ڈاکٹرس ان کی پوری طرح نگرانی کررہے ہیں۔
سابق لوک آیو کتہ جسٹس سنتوش ہیگڈے نے جسٹس وشواناتھ شیٹی پر ہوئے حملہ پر افسوس کا اظہارکرتے ہوئے لوک آیو کتہ دفتر کے حفاظتی انتظامات پر تشویش کا اظہارکیا۔ انہوں نے کہاکہ چھوٹے چھوٹے مالس میں پوری جانچ کے بعد ہی لوگوں کو اندر داخل ہونے کی اجازت دی جاتی ہے ۔انہوں نے لوک آیوکتہ جیسے اہم دفتر میں سکیورٹی انتظامات میں لاپروائی پر اپنی ناراضگی جتائی اورجسٹس وشواناتھ شیٹی کی جلد از جلد صحتیابی کیلئے دعا کی۔
چہارشنبہ کی دوپہر 1.50 بجے ایک معاملہ کو لے کر ملزم لوک آیوکتہ دفتر پہنچا تھا۔ جسٹس وشواناتھ شیٹی کے چیمبرمیں پہنچ کر ان سے بات کرنے کے بہانے اپنے ساتھ لائے چاقو کو نکال کر تین چارمرتبہ جسٹس وشواناتھ شیٹی پرحملہ کردیا۔
شہرکے عام دفاتر میں بھی میٹل ڈیٹکیٹرلگائے جاتے ہیں لیکن ریاست میں پیش آنے والے بڑی بدعنوانیوں کے معاملات کی جانچ کرنے والے لوک آیوکتہ دفترمیں میٹل ڈیٹکٹر خراب پڑا ہوا ہے ۔اس کی اطلاع پاکر ہی ملزم تیج راج شرما آسانی سے چاقو اپنے ساتھ رکھ کر لوک آیوکتہ دفتر کے اندر داخل ہوا تھا۔ اس حملہ کے بعد ملزم تیج راج شرماکے لوک آیوکتہ دفتر کے سامنے سے فرارہونے کی کوشش کے دوران ودھان سودھا پولیس نے فوری اسے دھر لیا اور معاملہ درج کرلیا ۔
سنٹرل زون کے ڈپٹی کمشنر آف پولیس چندرگپتا کی قیادت میں اس معاملہ کی جانچ کی جارہی ہے ۔حکومت نے اس معاملہ کو کافی سنجیدگی سے لیتے ہوئے کہا کہ اس بات کو یقینی بنایا جائے گا کہ حملہ میں ملوث ملزم کو سخت سے سخت سزا مل سکے۔