نجی اسکولوں میں ڈونیشن کے خلاف والدین اور کنڑا تنظیموں کااحتجاج،وزیر تعلیمات تنویر سیٹھ کی رہائش گاہ پر توڑ پھوڑ
بنگلورو،7؍اکتوبر(ایس او نیوز) نجی اسکولوں میں من مانے طریقے سے ڈونیشن کی وصولی کے خلاف احتجاج کرتے ہوئے آج والدین نے شہر کے ریس کورس روڈ پر واقع وزیر براے بنیادی وثانوی تعلیمات ، اقلیتی بہبود واوقاف تنویر سیٹھ کے گھر پر دھاوا بول دیا اور یہاں گھس کر گھر کی کھڑکیوں کے شیشے توڑ دئے اور فرنیچر کو بھی نقصان پہنچایا۔آج صبح مختلف اسکولوں میں زیر تعلیم بچوں کے والدین نے کنڑا تنظیموں کے کارکنوں کے ساتھ تنویر سیٹھ کے گھر کا گھیراؤ کیا اور دیکھتے ہی دیکھتے صورتحال قابو سے باہر ہوگئی۔ ریاست کے تعلیمی نظام میں سدھار کیلئے ضروری قدم اٹھانے اور کنڑا اسکول کے نام پر اجازت حاصل کرکے انگریزی اسکول چلانے والے اداروں کے خلاف کارروائی ، ڈونیشن پر روک اور نجی کالجوں پر گرفت مضبوط کرنے کا مطالبہ کرتے ہوئے ان لوگوں نے وزیر موصوف کی رہائش گاہ کے روبرو احتجاج شروع کردیا۔ چونکہ وزیر موصوف گھر پر موجود نہیں تھے، کارکن مشتعل ہوگئے اور پہلے انہوں نے گھر کے صحن میں رکھے ہوئے گملوں کو توڑ دیا اور بعد میں دفتر اور رہائش کی کھڑکیوں کو بھی نقصان پہنچایا ، اس سے پہلے کہ ہائی گراؤنڈس پولیس تنویر سیٹھ کی رہائش گاہ تک پہنچتی، احتجاجیوں نے کافی نقصان پہنچا دیا تھا۔ پولیس ٹیم نے احتجاجیوں کو گرفتار کرلیا۔
