بحری جہازوں کی ٹکر کے بعد عراقی جہاز سمندر میں ڈوب گیا، 21 میں دس لوگوں کو بچانے کی خبر
بغداد،20اگست(ایس او نیوز؍آئی این ایس انڈیا)علاقائی پانیوں میں عراق اور ایک دوسرے ملک کے دو بحری جہازوں میں ہونے والے تصادم کے نتیجے میں عراقی بحری جہاز مکمل طور پر سمندر میں ڈوب گیا۔ اس جہاز پر کم سے کم 21سیلر سوار تھے۔عراق کے سرکاری ٹی وی پر ہفتے کی شام نشر کی گئی ایک خبر میں بتایا گیا ہے کہ عراق اور جمہوریہ سینٹ وینسینٹ کے جہازوں میں تصادم ہوا، جس کے نتیجے میں عراقی جہاز مکمل طورپر تباہ ہوگیا۔وزارت برائے ٹرانسپورٹ عراق کی جانب سے جاری کردہ ایک بیان میں کہا گیا ہے کہ عراق کے المسبار اور جمہوریہ سینٹ وینسینٹ کا علم لہرانے والے رویال ارسنل کے درمیان یہ المناک تصادم علاقائی پانیوں میں گذشتہ روز ہوا۔
بیان میں کہا گیا ہے کہ عراقی بحری جہاز پر 21سیلر سوار تھے۔ ریسکیو ٹیموں نے فوری آپریشن میں 10افراد کو زندہ بچا لیا ہے جب کہ 4افراد کی لاشیں نکالی گئی ہیں۔ ڈوبنے والے دیگر افراد کی تلاش جاری ہے۔ مخالف سمت سے آنے والے جہاز کی ٹکر سے عراقی جہاز مکمل طور پر سمندر میں غرق ہو گیا تاہم حادثے کا شکار ہونے والے دوسرے جہاز کے بارے میں معلومات نہیں مل سکیں۔