جکارتہ 29/اکتوبر(ایس او نیوز/ایجنسی ) انڈونیشیا میں کم قیمت پر سفری سہولیات فراہم کرنے والی کمپنی "Lion Air" کا ایک مسافر طیارہ پیر کے روز سمندر میں گر کر تباہ ہو گیا۔ انڈونیشیا کی وزارت ٹرانسپورٹ کے مطابق بدقسمت طیارے میں 189 افراد سوار تھے۔رپورٹ شائع ہونے تک ریسکیوں ٹیموں نے 6 مسافروں کی لاشیں برآمد کرلی تھی، جبکہ باقی کی تلاش جاری تھی۔
انڈونیشیا کی سرچ اینڈ ریسکیو ایجنسی کے سربراہ نے تصدیق کی ہے کہ جس مقام پر طیارے سے رابطہ منقطع ہوا تھا وہاں طیارے کا ملبہ مل گیا ہے۔ انہوں نے مزید بتایا کہ حادثے میں کسی کے زندہ بچ جانے کی تصدیق نہیں کی جا سکتی۔
اس سے قبل پیر کے روز انڈونیشیا کی شہری ہوابازی کے ادارے نے اعلان کیا تھا کہ ملک میں کم کرایوں والی فضائی کمپنی Lion Air کا ایک مسافر طیارہ اڑان بھرنے کے 13 منٹ بعد ریڈار کی اسکرین سے غائب ہو گیا۔
انڈونیشیا اور ایئر لائن حکام کے مطابق یہ طیارہ مقامی وقت کے مطابق صبح 6بج کر 10منٹ پر جکارتا سے روانہ ہوا اور 7بج کر 20منٹ پر اسے بنگکا بیلی ٹنگ جزائر کے شہر پنگکال پینانگ پہنچنا تھا، مگر اس سے پہلے وہ سمندر میں گر کر تباہ ہوگیا۔ بتایا گیاہے کہ بوئنگ737 طیارے میں 210افراد کے بیٹھنے کی گنجائش ہوتی ہے۔