ہبلی 21؍اگست (ایس او نیوز) حج کے مبارک سفر پر روانہ کرنے کے نام پر دھوکہ دہی کرنے سے بھی لوگ باز نہیں آتے ۔ اور افسوس وندامت تو تب ہوتی ہے جب اس طرح کافریب دینے والے عام مسلمان نہیں بلکہ کوئی اہم دینی شناخت رکھنے والے مسلمان ہوتے ہیں ۔

اس طرح کی دھوکہ دہی کی تازہ واردات ہبلی میں پیش آئی ہے جس میں حشمت رضا قادری نامی ایک شخص نے کُل 58مسلمانوں کو دھوکہ دیا ہے جن سے اس نے تین لاکھ سے چار لاکھ روپے حج کے سفر کے لئے وصول کیے تھے۔معلوم ہوا ہے کہ حشمت رضاقادری نے حج پر جانے کے خواہشمندوں سے رقم اور پاسپورٹ لینے کے بعد انہیں 23اگست کو سفر پر روانہ کرنے کا وعدہ کیاتھا۔ مگر اس طرح جمع کردہ ڈیڑھ کروڑ کے قریب رقم اور پاسپورٹ لے کر اب حشمت قادری اپنی فیملی کے ساتھ لاپتہ ہوگیا ہے۔اس دوران پتہ چلا ہے کہ یہی حشمت قادری گزشتہ سال بھی پندرہ لوگوں کو اسی طرح حج پر بھیجنے کے نام سے دھوکہ دے چکا ہے۔

حشمت قادری سے فریب کھانے والے افراد نے اب پولیس کے پاس اس کے خلاف شکایت درج کروائی ہے۔معلوم ہواہے کہ پرانی ہبلی پولیس اسٹیشن میں معاملہ درج کرنے کے بعد ملزم کو گرفتار کرنے کے لئے جال بچھایا گیا ہے۔