ہبلی میں جہینر کو لے کرشوہرکا بیوی کے ساتھ جھگڑا؛ نوبیاہتا دلہن پر تیل چھڑک کر آگ لگادی
ہبلی 29؍ستمبر (ایس او نیوز) جہینر کے لے کر اپنی بیوی کے ساتھ ہمیشہ جھگڑنے والے ایک شخص کی طرف سے اسے جلاکر مارڈالنے کی کوشش کا معاملہ ہبلی کے گوپن کوپّا میں سامنے آیا ہے۔
بتایا گیا ہے کہ شوہر کے ہاتھوں جلائی جانے والی شہنازکی شادی اسماعیل نداف نامی شخص کے ساتھ گزشتہ پانچ مہینے قبل ہی ہوئی تھی۔ فی الحال شہناز بری طرح زخمی حالت میں ہبلی کے کیمس اسپتال میں زندگی اور موت کی جنگ لڑ رہی ہے۔
اسماعیل کے بارے میں بتایا جاتا ہے کہ وہ شراب کا عادی ہے اور بیوی کو اپنے مائیکے سے جہیز لانے کے لئے ہمیشہ ہراساں کیا کرتا تھا۔اسی وجہ سے شہناز نے مبینہ طور پر اس سے قبل دو مرتبہ خودکشی کی کوشش بھی کی تھی۔اس بار رات کے وقت معمولی بات پر دونوں کے بیچ جو جھگڑا شروع ہواتو اسماعیل نے بیوی کو بری طرح پیٹنے کے بعد اس پر پٹرول چھڑک کر اسے آگ لگادی جس کی وجہ سے وہ60 فیصد تک جل گئی ہے۔
بتایا گیا ہے کہ اتنی بری طرح جلنے کے بعد بھی اسماعیل کے گھر والوں نے شہناز کو کسی اسپتال میں داخل نہیں کیا تھا۔اس غیر انسانی حرکت کو دیکھ کر پڑوسیوں نے زخمی شہناز کو اسپتال پہنچانے کا بندوبست کیا۔ واردات کے بعد اسماعیل فرار ہوگیا ہے۔ پولیس نے کیس درج کرلیا ہے۔
