مڈکیری،8؍ جولائی (ایس او نیوز) گزشتہ 24؍ گھنٹوں سے ہورہی مسلسل موسلادھار بارش سے کورگ ضلع کے ندی نالے لبریز اور سڑکیں مکانات جل تھل ہوگئے ہیں ۔ندی خطرہ کے نشان سے اوپر بہہ رہی ہے۔ بارنگی ذخیرہ آب سے پانی چھوڑا جارہا ہے۔
6؍ جولائی بروز جمعہ دوپہر سے شرو ع ہوئی بارش بغیر کسی وقفہ کے مسلسل ہورہی ہے۔ موسلادھار بارش کے پیش نظر بروز ہفتہ اسکول اور کالجوں کو چھٹی کا اعلان کردیا گیاتھا۔ گزشتہ 24؍ گھنٹوں کے دوران مرکیرہ تعلقہ میں ریکارڈ بارش درج کی گئی ہے۔ بھاگمنڈل کے تریوینی سنگم میں ندی کے پانی کی سطح میں اضافہ ہوا ہے۔ اس علاقہ میں سڑکیں جل تھل ہونے کی وجہ سے معمولات زندگی درہم برہم ہوگئے ہیں۔ گرام کے رہائشیوں اور سیاحوں کو وہاں سے محفوظ لے جانے کے لئے بوٹ کاانتظام کیاگیا ہے۔ تل کاویری میں ژالہ باری بھی ہورہی ہے۔ مرکیرہ شہر میں مسلسل بارشوں کے ساتھ زبردست ٹھنڈی بھی چھا گئی ہے۔ منگلا دیوی نگر میں کرنٹ کے کھمبے زمیں بوس ہوگئے ہیں دیگر علاقو ں میں بھی عوامی مال وجائیداد کو نقصان پہنچا ہے۔ سنٹی کوپہ سیوہلی میں بھی موسلا دھار بارش کی وجہ سے کافی باغات میں کام کرنے والے قلی مزدوری کو بھی چھٹی دے دی گئی ہے ۔ گزشتہ 24؍ گھنٹوں کے دوران کورگ ضلع میں بارش کی اوسط شرح 98.01؍ ایم ایم ریکارڈ کی گئی ہے۔ گزشتہ سال اس دن 15.39؍ ایم ایم بارش ہوئی تھی۔
جنوری سے اب تک 1461.73؍ ایم ایم بارش ریکارڈ کی گئی ہے۔ گزشتہ سال اسی مدت میں 797.39؍ ایم ایم بارش ضلع بھر میں مسلسل ہوئی ۔ موسلادھار بارش سے ندی کے اندرونی بہا ؤ میں اضافہ ہوا ہے۔ سیلابی صورتحال سے بچنے کی خاطر ہارنگی آبی ذخیرہ سے 4؍ کریسٹ گیٹ کے ذریعہ اضافی پانی کاویری ندی کی سمت موڑ دیاگیا ہے۔ ہارنگی آبی ذخیرہ کی آبی سطح زیادہ سے زیادہ 2859؍ فیٹ ہے۔شام 5؍ بجے تک 2856؍ فیٹ تھی۔ آبی ذخیرہ کا اندرونی بہاؤ24.450؍ کیوسیکس تھا۔ اب تک 1200؍ کیوسیک پانی بہایاگیا ہے، 8.5؍ ٹی ایم سی گنجائش والے ہارنگی آبی ذخیرہ میں فی الحال 7.25؍ ٹی ایم سی پانی ذخیرہ ہوا ہے۔ گزشتہ سال23؍ جولائی کو لبریز ہوا ۔ ہارنگی آبی ذخیرہ اس مرتبہ 15؍ دن پہلے جولائی کے پہلے ہفتہ میں لبریز ہوگیا ہے۔ ہارنگی سے چھوڑا جانے والا اضافی پانی کورگ کے قریب ہارنگی ندی سے ہوتے ہوئے کاویری ندی او رپھر کرشناراجہ ساگر میں مل جائے گا۔