بنگلورو،13؍اگست(ایس او نیوز)سابق وزیراعظم اور جنتادل (ایس) کے قومی صدر ایچ ڈی دیوے گوڈانے اشارہ دیا ہے کہ وزیر اعلیٰ ایچ ڈی کمارسوامی قومی سیاست کا رخ کرسکتے ہیں۔

ہاسن میں اخباری نمائندوں سے بات چیت کرتے ہوئے انہوں نے کہاکہ حالانکہ کمار سوامی نے لوک سبھا انتخابات سے خود کو دور رکھنے کا فیصلہ کیا ہے، لیکن ممکن ہے کہ وہ قومی سیاست کا حصہ بن جائیں۔ ریاست میں کانگریس جنتادل (ایس) مخلوط حکومت کو کمزور کرنے بی جے پی کی کوششوں پر شدید نکتہ چینی کرتے ہوئے سابق وزیر اعظم نے کہاکہ بی جے پی کے قومی صدر امت شاہ ایسی کوششوں کو ہوا دینے میں لگے ہوئے ہیں۔

انہوں نے کہاکہ ریاست میں کانگریس اور جنتادل (ایس) کے درمیان کافی مضبوط ہیں اس اتحاد کو کمزور کرنا کسی کے بس کی بات نہیں۔ پانچ سال تک یہ اتحاد برقرار رہ کر ریاستی عوام کی فلاح وبہبود کے لئے کام کرے گا۔ اس موقع پر دیوے گوڈا نے اشارہ دیا کہ ہاسن پارلیمانی حلقے سے اس بار وہ اپنے پوتے پرجول ریونا کو میدان میں اتاریں گے اور ان کی کامیابی کے لئے خود احلقے میں رہ کر انتخابی مہم چلائیں گے۔