ہبلی یکم اپریل (ایس او نیوز) بی جے پی کے رکن پارلیمان پرہلاد جوشی کے خلاف ہبلی کے قصبہ پولیس اسٹیشن میں مسلمانوں کے تعلق سے ہتک آمیز ریمارکس پاس کرنے پر کیس درج کردیا گیا ہے۔

بتایاجاتا ہے کہ گرو سدپّا نامی جس شخص کا کچھ دنوں پہلے جو قتل ہوا تھا اس کے گھر پر تعزیت کے لئے پہنچے پرہلاد جوشی نے ’صدرصوفہ‘ نامی اس علاقے کے تعلق سے کہا کہ یہ علاقہ ان دنوں ’مِنی پاکستان‘ بن گیا ہے اور یہاں کی مقامی مسجد میں ہتھیاروں کی ذخیرہ اندوزی کی جارہی ہے۔ اس طرح کے اشتعال انگیز بیان کے پس منظر میں محمد حنیف نامی ایک شخص نے پولیس میں شکایت درج کروائی جس کے بعد پرہلاد جوشی پر آئی پی سی کی دفعہ 153A(مذہبی اور فرقہ وارانہ گروہوں کے بیچ عداوت پیدا کرنا) اور298(جان بوجھ کرکسی شخص کے مذہبی جذبات مجروح کرنا) کے تحت مقدمہ درجہ کرلیا گیا ہے۔

خیال رہے کہ بی جے پی صدر امیت شاہ جب داونگیرے کے دورے پر آئے تھے تو ان کی ہندی تقریر کا غلط کنڑا ترجمہ کرکے پرہلاد جوشی اخباروں کی سرخیوں میں آنے کے ساتھ ہی ساتھ پارٹی کے لئے ہزیمت کاسبب بن گئے تھے۔ انہوں نے غلط ترجمہ اس طرح کیا تھا کہ :’’وزیرا عظم مودی دلتوں کے فائدے کے لئے کوئی کام نہیں کررہے ہیں، اور ملک کو تباہ وبرباد کررہے ہیں۔‘‘