گلبرگہ میں آوارہ کتوں نے پانچ سالہ بچی کو چیر پھاڑ کر ہلاک کرڈالا
کلبرگی20؍ اپریل (ایس او نیوز)گلبرگہ کے کملا پورا علاقے میں آدھی رات کے وقت آوارہ کتوں نے ایک پانچ سالہ بچّی کو چیر پھاڑ کر ہلاک کرڈالا۔موصولہ تفصیلات کے مطابق نندنی (۵سال) کو گہری نیند میں چھوڑ کر اس کی والدہ رینوکا آدھی رات کو پانی بھرنے کے لئے چلی گئی تھی، کیونکہ اس گاؤں میں پانی کی سپلائی آدھی رات کو ہی ہوا کرتی ہے۔جب وہ پانی لے کر واپس لوٹی تو نندنی بستر پر موجود نہیں تھی۔
رینوکا نے جب باہر آکر تلاش کیا تو تھوڑی دوری پر آوارہ کتے اس کی بچی کو نوچ کھسوٹ رہے تھے۔ رینوکا اپنی بچی کو کتوں سے بچاکر گھر لائی تو دیکھا کہ اس کی گردن اور حلق پر گہرے زخم آئے تھے، اور نندنی دم توڑ چکی تھی۔ کہتے ہیں کہ بچی کا والداروند جادھو دبئی میں ملازمت کرتا ہے۔
گمان کیا جاتا ہے کہ جب بچی کی نیند سے آنکھ کھلی ہوگی تو اپنی ماں کو قریب نہ پاکر وہ ماں کی تلاش میں گھر سے باہر نکلی ہوگی اور آورہ کتوں کا شکار بن گئی ہوگی۔