کاروار:کیچڑ سے بھرے کھیت میں کھیل کود کے مقابلے
کاروار 9؍اکتوبر(ایس او نیوز) کاروار تعلقہ کے توڈور نامی مقام پرڈپارٹمنٹ آف یوتھ ایمپاورمنٹ اینڈ اسپورٹس ، ورکنگ جرنلسٹ ایسوسی ایشن اور گووند دیوا کلچرل اینڈ اسپورٹس کلب کے اشتراک سے کیچڑ بھرے کھیت میں مختلف کھیلوں کے مقابلے منعقد کیے گئے۔
والی بال، تھروبال، رسہ کشی، لیموں اور چمچے جیسے مختلف کھیلوں میں طلبہ کے علاوہ صحافیوں نے بھی حصہ لیا اورنیشنل ہائی وے 66سے متصل کھیت میں منعقدہ کھیل کے ان دلچسپ مقابلوں کو دیکھنے کے لئے تماشائیوں کا ہجوم لگ گیا۔کھیل کود کے مقابلوں کا افتتاح ضلع پنچایت رکن چائیترا کوٹھارکر نے کیا۔ محکمہ یوتھ ایمپاورمنٹ اینڈ اسپورٹس کی اسسٹنٹ ڈائریکٹر جی گائیتری، تعلقہ پنچایت رکن نندنی گنگی اور ڈسٹرکٹ ورکنگ جرنلسٹ ایسوسی ایشن کے صدر ٹی بی ہری کانت وغیرہ موجود تھے۔
اس موقع پرکھیل کے مقابلے جیتنے والوں کو انعامات سے نوازاگیا ۔اس کے علاوہ مقامی طور پر گیان پد اوریکش گان فنکاروں اوردیسی علاج کے لئے شہرت پانے والی کچھ شخصیات کی عزت افزائی بھی کی گئی۔