پسماندہ طبقات کو 50 فیصد تک ریزرویشن دینا زیر غور: کرناٹک کے وزیراعلیٰ سدرامیا کا بیان
بنگلورو۔3؍جون(ایس او نیوز) ریاست میں ذات پات کی بنیاد پر کرائی گئی مردم شماری کی رپورٹ منظر عام پر آنے کے بعد اس کے اعداد وشمار کے مطابق پسماندہ طبقات کو افزود ریزرویشن دینے کا فیصلہ لیا جائیگا۔ یہ بات آ ج وزیر اعلیٰ سدرامیا نے کہی۔
ریاست میں کانگریس حکومت کے چار سال کی تکمیل کے سلسلے میں میسور میں منعقدہ سادھنا سماویش میں شرکت کیلئے میسور آمد پر اخباری نمائندوں سے بات چیت کرتے ہوئے سدرامیا نے کہاکہ ریاست میں پسماندہ طبقات کے مستقل کمیشن نے ریاست بھر میں سماجی، تعلیمی اور معاشی سروے کیا ہے۔اس سروے کی رپورٹ ملنے کے بعد پسماندہ طبقات کو سماجی اور معاشی طور پر آگے بڑھنے کیلئے مناسب ریزرویشن دیا جائے گا۔ ممکن ہے کہ اس حد کو 50 فیصد تک بڑھایا جاسکتا ہے۔ ریاستی بی جے پی صدر بی ایس یڈیورپا کی طرف سے اگلے انتخابات میں بی جے پی کے اقتدار پر آجانے کے یقین پر طنز کرتے ہوئے سدرامیا نے کہاکہ بہت جلد انتخابات کے بعد یڈیورپا کابھرم ٹوٹ جائے گا۔
یڈیورپا کے بیانات کی وجہ سے کانگریسیوں کو گھبرانے کی ضرورت نہیں ہے۔یڈیورپا کو وزیراعلیٰ بننے کے خواب اب بہت زیادہ آنے لگے ہیں ، اسی لئے غیر ضروری بیان بازی میں الجھے ہوئے ہیں۔ دلتوں کے گھر پر کھانا کھانے کا ناٹک کیا جارہا ہے، کسانوں کے قرضہ جات معاف کرنے کا بے تکا مطالبہ کیا جارہا ہے۔ مرکز میں بی جے پی ہی برسر اقتدار ہے، وزیر اعظم سے کہہ کر یڈیورپا پہلے قومی بینکوں سے کسانوں کی طرف سے حاصل کیا گیاقرضہ معاف کروائیں۔ مرکزی حکومت اگر کسانوں کے قرضے معاف کردے تو ریاستی حکومت بھی قرضہ جات معاف کرنے کیلئے تیار ہے۔
شیموگہ کے میگان اسپتال کے عملے کی طرف سے ایک مریض کو اسٹریچر دینے سے انکار کے بعد ریاست بھر میں مچے ہنگامہ پر ردعمل ظاہر کرتے ہوئے سدرامیا نے کہاکہ اس اسپتال میں ایک معمر مریض کے ساتھ بدسلوکی کرنے والے عملے کے خلاف سخت کارروائی کی جائے گی، اس سلسلے میں انہوں نے رپورٹ طلب کی ہے۔ انہوں نے کہاکہ اس معاملہ میں جانچ کی بھی ہدایت دی گئی ہے کہ اس اسپتال کو مہیاکرائے گئے وہیلر چیر اور اسٹریچر کہاں گئے؟۔ضلع ہیلتھ آفیسر کی طرف سے اس سلسلے میں رپورٹ ملنے کے بعد کارروائی کی جائے گی۔ انہوں نے کہاکہ یہ خبر ٹی وی پر دکھاتے ہی کارروائی کرنا ممکن نہیں ہے۔اس کیلئے چند سرکاری ضوابط ہیں ، ان کی تکمیل ضروری ہے۔ ہبلی کے کمس اسپتال میں بھی اسی طرح کی ہراسانی اور ایک بچے کی نعش وارثوں کے حوالے کرنے سے انکار کے متعلق سوال پر سدرامیا نے کہاکہ اس سلسلے میں بھی وہ رپورٹ طلب کریں گے اور مناسب کارروائی کی جائے گی۔