بین الاقوامی شہرت یافتہ دسہرہ تقریبات کا آغاز
بنگلورو،9؍اکتوبر(ایس او نیوز) عالمی شہرت یافتہ دسہرہ تقریبات کا کل سے باضابطہ آغاز ہوجائے گا۔انفوسس فاؤنڈیشن کی چیر پرسن ڈاکٹر سدھا مورتی ان تقریبات کا رسمی طور پر افتتاح کریں گی۔ کل سے 9 دنوں تک شہر محلات میں دسہرہ تقریبات کا اہتمام کیا جائے گا اس کے لئے میسور کو دلہن کی طرح سجایا جائے گا۔ دسہرہ تقریبات کو عالیشان پیمانے پر منانے کے لئے ضلعی انتظامیہ کی طرف سے تمام انتظامات کئے گئے ہیں۔ تو دوسری طرف یہاں پر سیکورٹی کے لئے بھی معقول بندوبست کیا گیا ہے۔ بیرون ملکی سیاحوں کی بڑی تعداد میں دسہرہ تقریبات کا نظارہ کرنے کے لئے میسور کا رخ کیا ہے، جس کی وجہ سے یہاں کی تقریباً تمام ہوٹلیں بک ہوگئی ہیں۔ کل صبح دسہرہ تقریبات کے آغاز کے موقع پر وزیراعلیٰ کمار سوامی، نائب وزیر اعلیٰ ڈاکٹر پرمیشور، ضلع انچارج وزیر جی ٹی دیوے گوڈا دیگر وزراء سارا مہیش ، جئے مالا ، پٹ رنگا شٹی ، ین مہیش ، راج شیکھر پاٹل ، اراکین پارلیمان واسمبلی اور دیگر عوامی نمائندے شریک رہیں گے۔دسہرہ تقریبات کے پیش نظر یہاں پر فلم میلہ ، کشتی مقابلے، دسہرہ اسپورٹس مقابلے، نمائش ، وغیرہ کا اہتمام کیا گیا ہے۔ دسہرہ تقریبات کا اختتامی جلوس جمبو سواری 19اکتوبر کی دوپہر ڈھائی بجے شروع ہوگا۔ دسہرہ تقریبات کے لئے حفاظتی انتظامات پر 5284 پولیس جوان اور 1600 ہوم گارڈس کو تعینات کرنے کے ساتھ 70کمانڈوز بھی تعینات کئے گئے ہیں۔ کے ایس آر پی ، سی اے آر اور ڈی اے آر جوانوں کی 57 ٹکڑیاں میسور پیالس اور دیگر مقامات پر تلاشی کے لئے 46 ٹیمیں بھی تعینات کی گئی ہیں۔ میسور رورل کے ایس پی ، میسور کے ڈی سی پی، اے سی پی سمیت 75 افسر سیکورٹی کی ڈیوٹی پر تعینات رہیں گے۔ ناخوشگوار حالات سے نپٹنے کے لئے یہاں پر تین بم اسکواڈ بھی تعینات کئے گئے ہیں۔ میسور کے پولیس کمشنر سبرامنیشور راؤ نے سیکورٹی انتظامات کی تفصیلات بتاتے ہوئے کہاکہ کل وزیر اعلیٰ ایچ ڈی کمار سوامی دسہرہ پولیس ہیلپ لائن کا افتتاح کریں گے۔ دسہرہ تقریبات میں محل کے اندر حفاظت کے لئے کے ایس آر پی کے گھوڑ سوار جوان روایتی شاہی لباس میں تعینات رہیں گے۔