اسپین کا کاتالونیا کی آزادی سے متعلق مذاکرات سے واضح انکار
میڈرڈ5اکتوبر(ایس او نیوز؍آئی این ایس انڈیا)ہسپانوی حکومت نے کہا ہے کہ ملک کے نیم خود مختار علاقے کاتالونیا کی آزادی کے موضوع پر پہلے کی طرح اب بھی کوئی مذاکرات نہیں کیے جائیں گے۔ میڈرڈ میں ہسپانوی وزیر اعظم ماریانو راخوئے کے دفتر سے جاری کردہ ایک بیان میں کہا گیا کہ کاتالونیا میں کرائے گئے آزادی کے متنازعہ ریفرنڈم کے انعقاد کو ملکی آئینی عدالت نے غیر آئینی قرار دے دیا تھا۔ اسی لیے میڈرڈ حکومت نہ تو کسی دباؤ میں آئے گی اور نہ ہی کسی غیر قانونی اقدام کے بارے میں کوئی بات چیت کی جائے گی۔ بیان کے مطابق کاتالونیا کی علاقائی حکومت کے سربراہ کارلَیس پْوجیڈیمونٹ کے ساتھ کوئی بات چیت اسی وقت ہو سکتی ہے، جب وہ ملکی آئین کے دائرہ کار میں رہتے ہوئے مکالمت کرنا چاہیں گے۔