بی جے پی مجھ پر الزامات ثابت کرنے میں ناکام؛الزام لگانے والے رکن کونسل اپنے قول کی پابندی کریں: سدرامیا
بنگلورو،16؍اکتوبر(ایس او نیوز؍عبدالحلیم منصور) وزیر اعلیٰ سدرامیا نے ان کے خلاف اراضی ڈی نوٹی فکیشن کا الزام لگانے والے بی جے پی رکن کونسل بی جے پٹ سوامی کو آڑے ہاتھوں لیتے ہوئے کہاکہ پٹ سوامی نے کہاتھاکہ سدرامیا کے خلاف اگر الزامات ثابت نہ ہوئے تو وہ پھانسی لے لیں گے، اب جبکہ الزامات ثابت نہیں ہوئے ہیں پٹ سوامی بتائیں کہ وہ اپنا پھندا کہاں لگارہے ہیں؟۔ میسور میں اخبار ی نمائندوں سے بات چیت کرتے ہوئے وزیر اعلیٰ نے کہاکہ ان کے خلاف الزامات ثابت کرنے میں پٹ سوامی ناکام ہوچکے ہیں۔ پٹ سوامی نے کہاتھاکہ مجھ پر اگر الزامات ثابت نہیں ہوئے تو ودھان سودھا کے سامنے پھانسی لے لیں گے۔ پٹ سوامی کو چاہئے کہ اپنے قول کی پابندی کا مظاہرہ کریں، لیکن انسانی ہمدردی کے ناطے وہ پٹ سوامی کو یہی مشورہ دیں گے کہ آئندہ کسی پر بھی کیچڑ اچھالنے سے پہلے جانچ کرلیں، انہیں پھانسی لینے کی کوئی ضرورت نہیں ہے۔ کسی پر بے بنیاد الزامات لگانے سے اگر وہ کمزور ہے تو ا س کا سیاسی کیریئر ختم ہوجائے گا۔اس طرح کا کھلواڑ کرنے سے بی جے پی والوں کو گریز کرنا چاہئے ۔ ریاست بھر میں بارش کی تباہ کاریوں کے متعلق ایک سوال پر سدرامیا نے کہاکہ حکومت کی طرف سے متاثرین کو مناسب معاوضہ دینے کیلئے ضروری قدم اٹھائے جائیں گے۔ کرناٹکا اوپن یونیورسٹی میں مبینہ دھاندلیوں کے بارے میں وزیر اعلیٰ نے کہا کہ دھاندلیوں میں جو بھی ملوث ہیں ان کے خلاف کارروائی کرنے کیلئے وہ مرکزی وزیر برائے فروغ انسانی وسائل کو ایک مکتوب روانہ کریں گے۔کل بنگلور میں مویشیوں کو غیر قانونی طور پر لے جائے جانے پر احتجاج کرنے والی خاتون پر حملہ کے متعلق ایک سوال پر سدرامیا نے کہاکہ حملہ کرنے والوں کے خلاف سخت کارروائی کرنے انہوں نے پولیس کمشنر سنیل کمار کو ہدایت جاری کی ہے۔