فاکس نیوز کے سبکدوش میزبان کے لیے25ملین ڈالر کی رقم
نیویارک23اپریل(ایس او نیوز/آئی این ایس انڈیا)امریکی ٹیلی ویژن چینل فاکس نیوز کے جنسی ہراسانی کے الزام میں ملازمت سے فارغ کیے گئے دیرینہ میزبان بیل اورائیلی کو ٹی وی چینل کی طرف سے 25 ملین ڈالر کی رقم ادا کیے جانے کا اعلان کیاگیاہے۔امریکی ذرائع ابلاغ میں آنے والی اس خبر کی فاکس نیوز کی طرف سیتصدیق نہیں کی گئی آیا وہ اپنے مشہور میزبان کو نوکری سے نکالے جانے کے بعد اسے ہرجانے کے طور پر یہ رقم ادا کرے گا یا نہیں۔ تاہم ذرائع ابلاغ کے مطابق پچیس ملین ڈالر کی رقم بیل اورائیلی کی ایک سال کی مجموعی تنخواہ سے کم ہے جو وہ ٹی وی چینل سے گذشتہ برسوں میں لیتے رہے ہیں۔67سالہ بیل اورائیلی کئی سال تک فاکس نیوز کے دی اورائیلی فیکٹر نامی پروگرام کے میزبان رہے ہیں۔ ان کا فلیگ شپ ٹی وی شو بہت زیادہ دیکھا جانے والا تھا مگر حال ہی میں ان پر خواتین کی طرف سے جنسی ہراسانی کا الزام سامنے آنے کے بعد ٹی وی انتظامیہ نے انہیں ملازمت سے ہٹا دیا تھا۔ ان کی جگہ اس ٹی وی شو کی میزبانی ایک دوسرے صحافی ٹاکر کلارسن کو دی گئی ہے۔سینتالیس سالہ ٹاکر کلارسن اپنے اشتعال انگیز بیانات اور سخت گیر موقف کی وجہ سے مشہور ہیں۔ انہوں نے فاکس نیوز میں تین ماہ قبل کام شروع کیا تھا۔اس سے قبل بیل اورائیلی کا پروگرام مسلسل 20سال تک ٹی وی کے ٹاک شوز میں چھایا رہا ہے۔ ایک بار اس پروگرام کی ریٹنگ30لاکھ ناظرین سے تجاوز کرگئی تھی۔اپریل کے اوائل میں اخبارنیویارک ٹائمز نے ایک اسٹوری فائل کی جس میں دعویٰ کیاگیاکہ اورائیلی اور فاکس نیوز نے جنسی ہراسانی کا سامنا کرنے والی پانچ خواتین کو زبان بند رکھنے کے لیے 13 ملین ڈالر کی رقم ادا کی تھی۔ اگرچہ اورائیلی نے اس الزام کو مسترد کردیا ہے تاہم ٹی وی انتظامیہ نے انہیں ملازمت سے ہٹا دیا۔