نتائج سے قبل دیوگوڑا نے دیئے اتحاد کے اشارہ،کہا- کچھ مسترد یا قبول کرنے کو تیار نہیں
بنگلور :13/مئی (ایس اونیوز /آئی این ایس انڈیا)کرناٹک اسمبلی انتخابات کی ووٹنگ ہوتے ہی سیاسی پارٹی حکمت عملی میں لگ گئی ہے۔ گرچہ نتائج آنے میں ابھی دو دن کا وقت باقی ہے، لیکن ایگزٹ پولز میں کنگ میکر بتائے جا رہے جنتا دل (سیکولر) نے اتحاد کے اشارہ دے دیئے ہیں۔جے ڈی ایس کے سربراہ ایچ ڈی دیوگوڑا نے کہا کہ فی الحال وہ کسی بھی چیز کو قبول کرنے یا پھر مسترد کرنے کی پوزیشن میں نہیں ہیں۔ 15 مئی کو ووٹوں کی گنتی ہے اور پھر دیکھتے ہیں کہ کیا نتیجہ آتا ہے۔ اس دوران بی جے پی کے سی ایم امیدوار یدی یورپا نے کہا کہ نریندر مودی اور امت شاہ میرے رابطے میں ہیں، ہر کوئی مکمل اکثریت سے جیت کو لے کر یقین ہیں، ہمیں پورا یقین ہے کہ 17 مئی کو حکومت کی تشکیل کریں گے۔ انہوں نے کہا کہ ہم 125 سے 130 سیٹ جیتیں گے۔ جبکہ کانگریس 70 سیٹوں کے اعداد و شمار بھی پار نہیں کر پائے گی۔یدی یورپا نے کہا کہ جے ڈی ایس 24 سے 25 سیٹیں ہی بمشکل جیت پائے گی۔ یدی یورپا نے کہا کہ بی جے پی کے حق میں مضبوط ’لہر‘ ہے اور کانگریس کے خلاف عوام میں غصہ ہے۔ دیوگوڑا کا یہ بیان اس بات کا اشارہ ہے کہ وہ مخلوط حکومت کا حصہ بن سکتے ہیں۔ اس سے پہلے انتخابات کے دوران وہ کئی بار کہہ چکے تھے کہ جے ڈی ایس کا کسی بھی پارٹی سے اتحاد نہیں ہو گا۔ واضح ہو کہ ہفتہ کو پولنگ ختم ہونے کے بعد جاری زیادہ تر ایگزٹ پولز میں بی جے پی اور کانگریس کے درمیان سیٹوں کا فرق خاصا کم رہنے اور جے ڈی ا یس کے کنگ میکر بننے کی پیشن گوئی کی گئی ہے۔ اس لحاظ سے دیوگوڑا کا یہ بیان قابل غور ہے کہ فی الحال وہ کسی بھی قرارداد کو قبول یا مسترد کرنے کی پوزیشن میں نہیں ہیں۔