حکومت پر نکتہ چینی کا امیت شا کو اخلاقی حق نہیں: سدرامیا کا بیان
بنگلورو۔14؍ اگست(ایس او نیوز) وزیر اعلیٰ سدرامیا نے بی جے پی کے قومی صدر امیت شا کی طرف سے ریاستی حکومت پر نکتہ چینی کو مسترد کرتے ہوئے کہاکہ رشوت خوری کے الزامات میں جیل یاترا کرنے والوں کے بازو بیٹھ کر امیت شا اگر اخلاقیات کی باتیں کریں تو اس سے اس پارٹی کی دیانتداری کا اندازہ بخوبی لگایا جا سکتا ہے۔ انہوں نے کہاکہ رشوت خور عناصر کے درمیان بیٹھ کر امیت شا کو ریاستی حکومت پر نکتہ چینی کا کوئی حق نہیں ہے۔ انہوں نے کہاکہ کانگریس میں اب تک کوئی بھی بی جے پی والوں کی طرح جیل جاکر آیا ہے اور نہ ہی کسی نے کسانوں پر کھاد کے بجائے گولیاں چلائی ہیں۔
سدرامیا نے کہاکہ بی جے پی کو اگر واقعی کسانوں سے ہمدردی ہے تو پہلے قومی بینکوں سے کسانوں نے جو قرضہ جات حاصل کئے ہیں وہ معاف کرائیں ، اس معاملے میں کسی طرح کی بہانے بازی نہ کی جائے۔ مرکز کی مودی حکومت نے اگر کسانوں کے قرضہ جات معاف نہ کئے تو یہ ظاہر ہوجائے گا کہ یہ حکومت کسانوں کی دشمن ہے۔ سابقہ منموہن سنگھ حکومت نے کسانوں کے 72 ہزار کروڑ روپیوں کے قرضے معاف کئے۔ اس سے پہلے 1991میں وی پی سنگھ حکومت نے دس ہزار کروڑ روپیوں کے قرضے معاف کئے ، اب مودی حکومت جہاں سرمایہ داروں کے ہزاروں کروڑ کے قرضے معاف کررہی ہے تو پھر کسانوں کے قرضے معاف کرنے میں اسے کیا دشواری ہے۔؟ وزیر اعلیٰ نے اس الزام کو مسترد کردیا کہ مہادائی تنازعہ کیلئے کانگریس ذمہ دار ہے۔ اس سے پہلے 2002میں واجپائی ملک کے وزیر اعظم تھے ، اگر وہ چاہتے تو مہادائی مسئلے کو فوراً سلجھاسکتے تھے۔ اسی وقت واجپائی حکومت نے منظوری کے باوجود کلسا بنڈوری کینال کی تعمیر رکوا دی تھی۔ امیت شا کی طرف سے ریاست کے سب سے بڑے وکلیگا مٹھ آدی چن چنگری کے سربراہ نرملا نند سوامی کی توہین کے متعلق سوشیل میڈیا میں بحث پر ردعمل ظاہر کرتے ہوئے سدرامیا نے کہاکہ امیت شا کو ایسا نہیں کرنا چاہئے تھا۔ مذہبی رہنماؤں سے ملاقات اور ان کے آداب ایک قومی سیاسی جماعت کے صدر کو ملحوظ رکھنے چاہئے تھے۔ سوشیل میڈیا پر انہوں نے بھی وہ تصویر دیکھی جس میں سوامی جی کے روبرو امیت شا ٹانگ پر ٹانگ ڈالے بیٹھے ہوئے ہیں۔ مذہبی رہنماؤں سے جس طرح پیش آنا چاہئے امیت شا ویسا نہیں پیش آئے۔ ریاستی حکومت کی طرف سے بی بی ایم پی کی حدود میں شروع کی جارہی اندرا کینٹین کے متعلق سدرامیا نے کہاکہ 16اگست کو بنگلور میں اے آئی سی سی نائب صدر راہول گاندھی بیک وقت 101اندرا کینٹینوں کا افتتاح کریں گے۔ باقی کینٹینوں کا افتتاح 2؍ اکتوبر کو گاندھی جینتی کے موقع پر کیا جائے گا۔