پورا عالم اسلام مسجدا قصیٰ کا متولی اور سرپرست ہے ،مسجد اقصیٰ کی تقسیم کی سازشیں کامیاب نہیں ہوں گی:امام قبلہ اول
مقبوضہ بیت المقدس ،27؍اگست(ایس او نیوز ؍آئی این ایس انڈیا)مسجد اقصیٰ کے امام وخطیب الشیخ محمد سلیم نے کہا ہے کہ صہیونی ریاست، اس کے تمام ادارے اور انتہا پسند تنظیمیں مل کر قبلہ اول کی تقسیم کی سازشیں کر رہی ہیں مگر عالم اسلام کسی صورت میں اپنے قبلہ اول کو یہودیوں اور مسلمانوں میں تقسیم نہیں ہونے دیں گے۔ انہوں نے کہا کہ فلسطینی شہریوں کو قبلہ اول تک پہنچنے سے روکنے کی سازشیں اور یہودیوں کو مقدس مقام تک رسائی کے لیے ہرممکن سہولت مہیا کرنے کے پس پردہ سازشوں کا مقصد فلسطینیوں کو مسجد اقصیٰ سے دور کرنا ہے۔ یہودی ایک سازش کے تحت مسجد اقصیٰ کو مسجد ابراہیمی کی طرح مسلمانوں اور یہودیوں میں زمانی اور مکانی اعتبار سے تقسیم کرنا چاہتے ہیںِ۔الشیخ سلیم نے کہا کہ مسجد اقصیٰ پر صہیونی ریاست کے حملے، جارحیت، ظلم وبربریت کا سلسلہ جاری ہے۔ آج سے 47سال پیشتر صہیونیوں نے قبلہ اول کو نذرآتش کرنے کی بھیانک سازش کی تھی۔ اس کے بعد صہیونی قبلہ اول کو نقصان پہنچانے کا کوئی موقع ہاتھ سے جانے نہیں دے رہے ہیں۔انہوں نے کہا کہ پورا عالم اسلام مسجد اقصیٰ کا متولی اور سرپرست ہے۔ اس لیے اسرائیلی یہ بھول جائیں کہ وہ قبلہ اول کو تقسیم کرنے کی سازشوں میں کامیاب ہوں گے۔