بنگلور رورل پولیس نے ایر کمانڈر پرویز کھوکر کے قاتلوں کو گرفتار کرلیا
بنگلورو،23؍فروری(ایس او نیوز)ملک بھر میں مرکز توجہ بننے والے ایر کمانڈر پرویز کھوکر کے قتل معاملے کو شہر کی پولیس نے سلجھاتے ہوئے اس سلسلے میں 12ملزمین کو گرفتار کرلیا ہے اور ان کے پاس سے 1.25کروڑ روپیوں کے زیورات ، ہیرے جواہرات وغیرہ ضبط کئے ہیں۔ 2؍نومبر2014کو شہر کے سوریہ نگر یسٹیٹ کلب کے قریب مقیم وظیفہ یاب ایر کمانڈر پرویز کا قتل کردیا گیا تھا۔ دوسال بعد اس قتل کے تمام بارہ ملزمین کاپتہ لگاکر انہیں گرفتار کرلیا گیا ہے۔یہ بات آج بنگلور رورل کے ایس پی امیت سنگھ نے بتائی۔انہوں نے بتایاکہ ملزمین کی شناخت آنیکل کے ہوسکور کے ساکن سرینواس 21، ناگراج 28، کاچرکنہلی کے گریش33، تپ گنڈنہلی کے سبرامنی 32، اتی بیلے کے سریش 38، مڑیوال کے ستیہ نارائنا 28، چک تما سندرا کے منجوناتھ 24سبرامنی 24تما راجو24، این بابو 26، ایم بابو 26، رویندرا 31کی حیثیت سے کی گئی ہے۔ ملزمین کے پاس سے نقد رقم اور زیورات کے علاوہ ایک ریوالور ، 60کروڑ روپیوں کی زمین کے اصلی دستاویزات وغیرہ ضبط کئے گئے ہیں۔ان پر ایک قتل کے علاوہ ڈکیتی کے پندرہ معاملات درج ہیں۔ بتایاجاتاہے کہ کل رات چندا پورا کے رام ساگر روڈ کے قریب ڈکیتی کا منصوبہ بنانے میں مصروف اس ٹولی کو معتبر اطلاع پر گرفتار کرلیا گیا۔