بنگلورو:18/ جولائی(ایس او نیوز) شہر میں میٹرو ٹرینوں کے استعمال کی بڑھتی مانگ اور مسافروں کی تعداد میں اضافہ کو دیکھتے ہوئے پرپل اور گرین لائن پر میٹرو ٹرینوں کی تعداد میں اضافہ کرنے کا بنگلور میٹرو ریل کارپوریشن نے منصوبہ بنایا ہے۔ بیپنا ہلی سے میسور روڈ کی طرف سے جانے والی پرپل لائن پر مسافروں کی تعداد میں غیر معمولی اضافے کو دیکھتے ہوئے پہلے ہی میٹرو ریل کے انتظامیہ نے گاڑیوں میں اضافہ کا فیصلہ کیا تھا، تاہم حال ہی میں شروع ہوئے میٹرو ریل پراجکٹ ریچ 1A کے تحت گرین لائن پر یلچن ہلی سے پینیا تک کی خدمات پر مسافروں میں غیر معمولی اضافہ کے سبب انتظامیہ نے شہر میں 50 میٹرو ریل گاڑیاں اور بڑھانے کا فیصلہ کیا ہے۔ بیپنا ہلی تا میسور روڈ میٹرو ریل خدمات کا استفادہ روزانہ تقریباً 3.2لاکھ افراد کررہے ہیں، جبکہ یلچن ہلی سے ناگسندرا تک کی ریل خدمات کا استفادہ کرنے والوں کی تعداد تقریباً پانچ لاکھ ہے۔ اتنی تعداد میں مسافروں کو سفر کی سہولت مہیا کرانے کیلئے بنگلور میٹرو ریل کارپوریشن نے تمام اسٹیشنوں پر ہر تین منٹ میں ایک ٹرین مہیا کرانے کا فیصلہ کیا ہے۔ اس کے ساتھ ہی میسور روڈ، آر وی روڈ، بنشنکری اور دیگر ریلوے اسٹیشنوں میں جہاں مسافروں کی تعداد بہت زیادہ آتی جاتی ہے، پارکنگ کے انتظامات بھی بہتر بنانے کا فیصلہ کیا ہے۔