بنگلورو،14؍جون(ایس او نیوز) ریاست کے اسکولوں اور کالجوں کو90 فیصد نصابی کتب پہنچادی گئی ہیں۔ وزیر برائے بنیادی وثانوی تعلیمات تنویر سیٹھ نے آج یہ بات ریاستی اسمبلی کو بتائی۔صفر ساعت میں بی جے پی رکن وشویشور ہیگڈے کاگیری کی طرف سے معاملہ اٹھائے جانے پرجواب دیتے ہوئے تنویر سیٹھ نے کہاکہ خشک سالی کے سبب کاغذ کے تین کارخانے بند ہوچکے ہیں ، ساتھ ہی درمیان میں لاریوں کی ہڑتال کے سبب پرنٹنگ پریسوں کو کاغذ پہنچانے میں پریشانی لاحق ہوئی، پھر بھی تعلیمی نصاب کی شروعات تک 90 فیصد نصابی کتب پہنچاد ی گئی ہیں۔ انہوں نے کہاکہ نصابی کتابوں کی خریداری کیلئے نیشنل پیپر مل سے کاغذ خرید کر مہیا کرایا گیا۔وزیر موصوف نے کہاکہ نجی کالجوں کو سخت ہدایت دی گئی ہے کہ وہ اپنی طرف سے کتابیں شائع کرکے فروخت نہ کریں۔ پھر بھی یہ اطلاع ہے کہ متعدد نجی اسکولوں نے حکومت سے نصابی کتب نہیں خریدی ہیں۔اس کا جائزہ لے کر خاطی اسکولوں کے خلاف کارروائی کی جائے گی۔انہوں نے کہاکہ رواں سال پہلی سے آٹھویں جماعت تک کے تعلیمی نصاب کی جامع پیمانے پر نظر ثانی کی گئی ہے۔اس سے قبل معاملہ اٹھاتے ہوئے وشویشور ہیگڈے کاگیری نے دعویٰ کیا کہ اسکولوں کو صرف 50 فیصد ہی کتاب پہنچ سکی ہیں۔ اس سے طلبا کو کافی پریشانی کا سامنا کرنا پڑ رہاہے۔