کوئٹہ،25؍اکتوبر(ایس او نیوز ؍آئی این ایس انڈیا)پاکستان کے سب سے بڑے صوبے بلوچستان کے دارالحکومت کوئٹہ کے مضافات میں پولیس ٹریننگ کالج پر تین خودکش حملہ آوروں نے حملہ کر کے کم از کم 61پولیس اہلکاروں کو جاں بحق اور 116کو زخمی کر دیا ہے۔اطلاعات کے مطابق پیر کی شب تقریبا دس بجے تین خودکش حملہ آور کوئٹہ کے مضافات میں واقعہ پولیس ٹریننگ کالج میں داخل ہوگئے اور انہوں نے پولیس کیڈٹس کے ہاسٹلز کو نشانہ بنایا۔پولیس ذرائع کے مطابق جاں بحق ہونے والوں میں سے زیادہ تر زیر تربیت پولیس اہلکار ہیں۔صوبائی عہدیدار سرفراز بگٹی نے میڈیا کو بتایا کہ سب سے پہلا حملہ پولیس ٹریننگ سینٹر کے عقبی علاقے میں واقع واچ ٹاور پر کیا گیا جہاں موجود سنتری نے بھرپور مقابلہ کیا لیکن جب وہ مارا گیا تو حملہ آور دیوار پھلانگ کر کالج کے اندر داخل ہونے میں کامیاب ہو گئے۔

ٹریننگ سینٹر سے بازیاب کروائے گئے ایک زیرِ تربیت اہلکار نے مقامی میڈیا سے بات کرتے ہوئے بتایا کہ ساڑھے نو سے دس بجے کے درمیان شدت پسندوں نے اندر داخل ہوتے ہی اندھا دھند فائرنگ شروع کر دی۔پاکستان فوج کے شعبۂ اطلاعات آئی ایس پی آر نے بھی ایک پریس ریلیز جاری کی ہے جس میں کہا گیا ہے کہ پانچ سے چھ دہشت گرد تربیتی مرکز میں داخل ہوئے ہیں اور ان کے خلاف آپریشن جاری ہے۔فوج اور سیکیورٹی فورسز نے کلئیرنس آپریشن مکمل کرنے کے بعد پولیس کالج کو کلئیر قرار دے دیا ہے۔