کرناٹکا میں معمول کی بارش کے مقابلے میں امسال تین فیصد کم ریکارڈ ہوئی بارش
بنگلورو،7؍اگست(ایس او نیوز) ریاستی وزیر مالگزاری آر وی دیش پانڈے نے خبر دی ہے کہ ریاست کرناٹک میں رواں مانسون کے دوران یکم جون سے 6 ؍ اگست تک سابقہ سالوں کے مقابلے میں تین فیصد بارش کم ریکارڈ کی گئی ہے۔ انہوں نے بتایا کہ 6/اگست تک عموماً 522 ملی میٹر بارش ریکارڈ ہوتی ہے، مگر امسال اس مدت میں صرف 505/ ملی میٹر ہی بارش ریکارڈ کی گئی ہے۔
اخبار نویسوں سے گفتگو کرتے ہوئے انہوں نے کہاکہ امسال ہوئی بارش کو اگر ریاست کے حصوں میں تقسیم کیا جائے تو ریاست کے جنوبی اندرونی علاقوں میں یہ اوسط 27 فیصد رہا۔ شمالی اندرونی علاقوں میں بارش کی کمی گزشتہ سال کے مقابل ریکارڈ کی گئی۔ یکم اگست تک شمالی اندرونی علاقوں میں 31 فیصد بارش ریکارڈ کی گئی، انہوں نے کہاکہ ریاست کے 90تعلقہ جات میں بارش معمول کے مقابل کم رہی،جبکہ 29 تعلقہ جات میں بارش کی شدید کمی محسوس کی گئی ہے۔مزید بتایا کہ 86 تعلقہ جات میں بارش کا اوسط معمول کے قریب رہا ہے۔
انہوں نے کہاکہ بارش میں اس کمی کے سبب گرمی کے موسم میں پینے کے پانی کی کمی کے اندیشوں کے پیش نظر ابھی سے احتیاطی تدابیر اپنانے کے لئے تمام محکموں کو ہدایات جاری کی جاچکی ہیں۔ انہوں نے کہاکہ بارش کی کمی کے سبب فصلوں کو جو نقصان ہوگا اس سے نمٹنے کے لئے محکمۂ زراعت کو واضح ہدایات جاری کی گئی ہیں۔ پینے کے پانی کی کمی کی شکایت جن تعلقہ جات میں ہوگی وہاں پر ابھی سے انتظامات کرنے تحصیلداروں کو ہدایت دے دی گئی ہے۔ تاکہ شدید گرمی کی صورت میں پانی کی پریشانی نہ رہے۔ اس کے علاوہ مہاتما گاندھی قومی روزگار ضمانت اسکیم کے تحت روزگار کے مواقع فراہم کرنے پر بھی زور دیا گیا ہے۔
انہوں نے کہا کہ ریاست بھر میں خشک سالی کی صورتحال سے نپٹنے کے لئے مختلف اضلاع کے ڈپٹی کمشنروں کی قیادت میں الگ الگ ٹیمیں ترتیب دی گئی ہیں۔ خشک سالی سے گزشتہ سال جو علاقے متاثر رہے ان علاقوں میں ڈپٹی کمشنروں سے کہا گیا ہے کہ ہر ہفتہ ویڈیو کانفرنس کے ذریعے وہ ضلع کی صورتحال سے ریاستی انتظامیہ کو آگاہ کرائیں تاکہ احتیاطی تدابیر اپنائی جاسکے۔