ترکی میں ہیلی کاپٹر تباہ، 12 افراد کی ہلاکت کا خدشہ
انقرہ،19اپریل(ایس او نیوز/آئی این ایس انڈیا) ترکی کے مشرقی علاقے میں ایک فوجی ہیلی کاپٹر کو حادثہ پیش آیا جس کے نتیجے میں اس میں سوار پولیس اہلکاروں سمیت بارہ افراد جاں بحق ہونے کا خدشہ ظاہر کیا جا رہا ہے۔ ہیلی کاپٹر پر پولیس اہلکاروں سمیت ایک درجن افراد سوار تھے۔ ترک فوجی ہیلی کاپٹر کو حادثہ مشرقی گورنری تونجلی میں خراب موسم کے باعث پیش آیا۔ ہیلی کاپٹر پر ایک جج، سات پولیس اہلکارو اورایک فوجی افسر سمیت 12 افراد سوار تھے۔
ترکی کے سرکاری میڈیا کے مطابق ہیلی کاپٹر کو حادثہ موسم کی خرابی کے باعث پیش آیا۔ تونجلی میں پہنچنے کے بعد ہیلی کاپٹر راڈار سے غائب ہوگیا جس کے بعد پتا چلا کہ وہ گر کرتباہ ہوگیا ہے۔’این ٹی وی‘ کے مطابق قریبی علاقے دیار بکر سے ایک دوسرا ہیلی کاپٹر حادثے کا شکار ہونے والے ہیلی کاپٹر کی جگہ پر اترا اور امدادی کارروائیاں شروع کردی ہیں۔خیال رہے کہ گذشتہ ماہ استنبول میں گردو غبار کے نتیجے میں ایک ہیلی کاپٹر گر کرتباہ ہوگیا تھا جس کے نتیجے میں چار روسیوں سمیت سات افراد جاں بحق ہوگئے تھے جب کہ گذشتہ بسر جولائی میں شمال مشرقی ترکی میں جیریسون میں پیش آئے ایک حادثے میں سات افراد ہلاک اور آٹھ زخمی ہوگئے تھے۔